Hongereni kwa Kukamilisha Ukarabati wa Machinji

Imewekwa: January 17th, 2023

Mwenyekiti wa CCM Wilaya ya Bukombe Matondo Kihanga Lutonja  ameupongeza uongozi wa Halmashauri ya Wilaya ya Bukombe kwa utekelezaji wa  agizo la Kamati ya Siasa Mkoa wa Geita la kukarabati  machinjio ya Mwalo ili wananchi waweze kupata huduma  pamoja na usalama wa nyama.

"Hongereni sana kwa utekelezaji wa agizo kwani Machinjio ya Mwalo ndiyo machinjio kubwa inayotoa huduma katika Mji wa Ushirombo."

Pongezi hizo amezitoa tarehe 16 Januari 2023 wakati kamati ya siasa  ya Wilaya ya  Bukombe  ilipotembelea na kukagua mradi huo.

Aidha katibu wa CCM Wilaya ya Bukombe Odilia Batimayo ameipongeza Ofisi ya TANESCO Wilaya ya Bukombe kwa  kuhakikisha huduma ya Umeme inapatikana katika Machinjio hiyo. Vile vile ameutaka uongozi wa halmashauri kuhakikisha unasimamia suala la usafi wa mazingira.

Kwa upande wake Mkurugenzi Mtendaji wa Halmashauri ya wilaya ya Bukombe Lutengano Mwalwimba amesema ukarabati wa Machinjio ya Mwalo umegharimu kiasi cha shilingi Milioni 12,000,000 kutoka katika fungu la mapato ya ndani na huduma imerejea kuanzia tarehe 15 Desemba, 2022 baada ya ukarabati kukamilika  na kukaguliwa na Afisa afya Wilaya.

Mnamo tarehe 10 Juni, 2021 Kamati ya Siasa  Mkoa ilifunga kwa muda machinjio ya Mwalo na huduma hiyo kuhamishiwa katika machinjio ya Katente lengo likiwa ni kuboresha huduma pamoja na usalama wa nyama kwa wananchi.