Kiasi cha shilingi bilioni 3.4 chapitishwa kufanya matengenezo ya barabara wilayani Bukombe.

Imewekwa: January 26th, 2022

Baraza la Waheshimiwa Madiwani Wilayani Bukombe tarehe 25 Januari, 2022 limepitisha bajeti ya shilingi Bilioni 3.4 kwa ajili ya matengenezo ya barabara zenye urefu wa km 134.47, kujenga makalavati 81 na kujenga mtaro ya maji wenye urefu wa km 1.2 na barabara ya AICT ( Mangabe) katika kipindi cha mwaka 2022/2023.

Meneja wa TARURA Wilayani Bukombe Mhandisi Henrico Shauri amesema katika Bajeti ya mwaka 2022/2023 mfuko wa barabara - Matengenezo unatarajia kutumia kiasi cha shilingi 781,030,000/= Tozo za mafuta kiasi cha shilingi 1,000,000,000, Mfuko wa Jimbo kiasi cha shilingi 500,000,000/=na fedha za maendeleo kiasi cha shilingi 1, 136,400,000/=.

Naye Mwenyekiti wa CCM Wilaya ya Bukombe Danieli Machongo amewataka wataalamu kutoka ofisi ya TARURA kuhakikisha wanazisimamia barabara hizo kwa uaminifu na uadilifu mkubwa.

" Hakikisheni mnazisimamia barabara hizi kwa uaminifu na uadilifu mkubwa ili ziweze kutatua changamoto na kuleta tijakwa wananchi wetu."

Akiongea katika kikao hicho Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewataka TARURA kuhakisha wanashirikiana na Halmashauri wakiwemo Waheshimiwa Madiwani katika kutekeleza miradi hiyo.

" Washirikisheni Waheshimiwa Madiwani katika utekelezaji wa miradi yenu kwani kwa kufanya hivyo miradi yetu italeta tija katika kuibua vipaumbele vya wananchi katika maeneo yao."

Naye Mwenyekiti wa Halmashauri ya Wilaya ya Bukombe Mhe Yusuph Mohamed Yusuph amesema Waheshimiwa Madiwani wataendelea kushirikiana na TARURA ili kuwaletea wananchi maendeleo.

Wakala wa barabara Vijijini na Mijini - Tanzania Wilayani Bukombe unasimamia mtandao wa barabara zenye urefu wa km 1,309.47 ambazo km 3.07 ni barabara za Lami, km 203.9 changarawe, km 1102.52 udongo na barabara zenye hali nzuri ni asilimia 25.71, hali ya wastani ni asilimia 8.58 na hali mbaya ni asilimia 65.71.