Kikundi cha MAGUKO chazinduliwa rasmi

Imewekwa: January 2nd, 2019

Mkuu wa Wilaya ya Bukombe Mhe. Said J. Nkumba leo tarehe 2 Januari, 2019 amezindua rasmi kikundi cha Maisha yangu ni maisha yako (MAGUKO) chenye madhumuni ya kusaidiana na Serikali pamoja na wananchi katika kuchangia, kukusanya na kuhakikisha uwepo wa damu ya kutosha wakati wote katika benki ya damu salama kupitia mpango maalumu wa “Tumia Damu Rudisha Damu.”

Mhe. Nkumba amewapongeza na kuwatakia kila la heri wanakikundi wa MAGUKO katika kazi  ya uzalendo wanayoenda kuifanya ya kuhakikisha benki ya damu katika Hospitali ya Wilaya ya Bukombe inapata damu ya kutosha ambayo itaweza kuwasaidia wananchi wote pindi wanapopata matatizo ya upungufu wa damu.

Aidha Mhe. Nkumba amewahakikishia wanachama wa MAGUKO kuwa changamoto zote walizoziwasilisha, ofisi ya Mkurugenzi Mtendaji itazipitia na kuzifanyia kazi na amewapatia kiasi cha Tsh 100,000.00 (Laki moja) ikiwa ni kuwaunga mkono kwa ajili ya kutunisha mfuko wa kikundi ili waweze kusonga mbele. Pia amemuomba Mkurugenzi Mtendaji wa Halmashauri  ya Wilaya ya Bukombe kuhakikisha anatoa taarifa ya kikundi hicho kwenye vikao vya Waheshimiwa Madiwani ili waweze kuwahamasisha wananchi kuchangia damu pindi wanapokuwa kwenye mikutano ya hadhara.

Akizungumza katika uzinduzi huo Mkurugenzi Mtendaji wa Halmashauri ya Wilaya ya Bukombe Ndg Dionis Myinga amewapongeza wanakikundi kwa jitihada wanazozifanya za kuhakikisha damu safi na salama inapatikana katika hospitali ya Wilaya kwa kufanya hivyo wataweza kuokoa maisha ya akinamama wajawazito na watoto chini ya umri wa miaka mitano.

Halmashauri ya Wilaya ya Bukombe inamahitaji ya chupa za damu 2584 kwa mwaka, chumba 216 kwa mwezi na chupa 8 kwa kila siku kwa ajili ya kuwahudumia wagonjwa ambao wanakadiliwa kuwa na uhitaji wa kuongezewa damu kutokana na sababu mbalimbali. Hayo ameyasema Kaimu Mganga mkuu wa Wilaya ya Bukombe Dr. Range Nyamhanga wakati akitoa taarifa ya damu salama.

Naye Katibu Msaidizi wa kikundi cha MAGUKO Ndg Macrina Bileha amesema changamoto wanazokabiliananazo ni pamoja na ukosefu wa usafiri, ukosefu wa vifaa vya hamasa na burudani (muziki) na ukosefu wa elimu ya zoezi hilo.

Kwa upande wake mwanakikundi wa MAGUKO Ndg. Frolah Bernad ametoa wito kwa jamii kuhakikisha inawapokea vizuri. “ Tunaomba wananchi watupokea  pindi tunapoenda kuhamasisha uchangiaji wa damu salama na tutambue kuwa jukumu la uchangiaji wa damu ni jukumu la wananchi wote hivyo  tushirikiane kwa pamoja na hatimaye tuwe na akiba ya kutosha katika benki ya damu.”

Halmashauri ya Wilaya ya Bukombe ina jumla ya vituo viwili vyenye uwezo wa kutoa huduma ya damu kwa wagonjwa wanaohitaji kuongezewa damu salama ambavyo ni Hospitali ya Wilaya ya Bukombe pamoja na kituo cha afya Uyovu.