Kikundi cha Runzewe Youth Innovative chapatiwa soko.

Imewekwa: November 17th, 2021

Katibu wa NEC, Siasa na Uhusiano wa Kimataifa na Mlezi wa Mkoa wa Geita Kanali Mstaafu Ngemera Lubinga imeitaka halmashauri ya Wilaya ya Bukombe kuhakikisha kikundi cha Runzewe Youth Innovative kinapatiwa soko la usambazaji wa bidhaa za mikanda ya Jipsam katika miradi yote inayotekelezwa na serikali ndani ya Wilaya ya Bukombe.

"Hawa vijana ni wabunifu sana, wanatengeneza bidhaa nzuri, halmashauri ihakikishe inawashika mkono kwa kununua bidhaa zao."

Hayo ameyasema tarehe 16 Novemba, 2021 katika ziara yake ya siku ya kwanza Wilayani Bukombe.

Akisoma taarifa ya mradi Katibu wa kikundi hicho Dickson Japhet amesema halmashauri iliwapa mkopo wa shilingi Milioni 11.7 na mpaka sasa kina mtaji wa shilingi Milioni 18.7 hivyo kimeweza kupunguza adha ya wananchi kufuata huduma mbali na kimeongeza ajira kwa vijana.

Akikagua ujenzi wa vyumba  sita vya madarasa vinavyogharimu kiasi cha shilingi Milioni 120 kwa ajili ya Mpango wa Maendeleo na Ustawi wa Taifa na Mapambano dhidi ya UVIKO - 19 katika shule tarajali ya sekondari Azimio kanali Lubinga amewapongeza wanauyovu kwa moyo wao wa kizalendo wa kuchangia miradi ya maendeleo.

"Hongereni sana Wanauyovu japo serikali imeleta fedha lakini bado mkaamua kushirikisha nguvu zenu hongereni sana."

Aidha amewataka Wanauyovu kuhakikisha wanajenga hosteli ili kuweza kupambana na mimba za utotoni kwa baadhi ya wanafunzi wa kike.

Kanali Mstaafu Ngemera Lubinga ambaye ni Mlezi wa Mkoa wa Geita ana ziara ya Siku mbili katika halmashauri ya Wilaya ya Bukombe.