"Liwe Jua Iwe Mvua mpaka miradi ikamilike."

Imewekwa: November 10th, 2021

"Tunataka miradi yetu ikamilike kwa wakati ili iweze kuwaletea wananchi manufaa iwe mvua liwe jua."

Hayo yamesemwa leo tarehe 9 Novemba, 2021 wakati kamati ya Fedha, Uongozi na Mipango ilipofanya ziara ya kukagua miradi mbalimbali ya maendeleo.

Pia kamati hiyo imemuelekeza Afisa Manunuzi Silasi Manoni kuhakikisha anafuatilia kwa nguvu zote ununuzi wa kifaa kilichohalibika kwenye kisima cha Machinjio ya Katente ili kisima hicho kianze kutoa maji na machinjio ya katente iweze kutoa huduma kwa wananchi.

"Tunataka machinjio yetu ianze kufanya kazi ili tuwe tumetekeleza azimio la kamati ya siasa ya Mkoa. kifaa kilichohalibika kwenye kisima cha maji Afisa manunuzi kifuatilie na itakapofika mwishoni mwa mwezi Novemba, 2021 machinjio ianze kutoa huduma kwa wananchi."

Aidha kamati imemuagiza Fundi Sanifu Majengo Neema Makala kuhakikisha ukarabati wa choo cha soko la Ushirombo unakamilika mara moja ili chanzo hicho kiweze kuiongezea halmashahui mapato.

Wakati wa ukaguzi wa ujenzi wa kituo cha Afya Bufanka kamati imeshauri kuwa Afisa Manunuzi Silasi Manoni na Mweka Hazina Wilaya Majubu John kuhakikisha wanawalipa wazabuni fedha zao kwa wakati ili waweze kuendelea kutoa huduma kwani kwa kufanya hivyo miradi yote itaendelea kusonga mbele.

Vile vile kamati imeupongeza Uongozi wa halmashauri ya Wilaya ya Bukombe kwa kuanzisha mradi wa Mashine ya kufyatulia matofali kwani mradi huo utasaidia kuiongezea halmashauri mapato na imeshauri kuwa Mkurugenzi mtendaji aongeze watalaamu wa kufyatua matofali pamoja na vibarua ili uzalishaji uweze kuongezeka.

Miradi iliyotembelewa ni pamoja na Mashine ya kufyatulia tofali Ushirombo, Ukarabati wa choo cha soko Ushirombo, ukamilishaji wa ujenzi wa Maabara Zahanati ya Bukombe, Ujenzi wa kituo cha Afya Bufanka na ukarabati wa machinjio ya Katente.

Acram Issa Ulungu Mtendaji Mkuu kutoka Central Park Bees Limited amemuahidi Mkuu wa Wilaya ya Bukombe kufanya kazi kwa uwaminifu na kuhakikisha mradi unakamilika kwa wakati.

" Mkuu wa Wilaya hatutakuangusha tunaahidi kuipendezesha Bukombe.Tunaahidi kufanya kazi kwa uwaminifu mkubwa na tutahakikisha mradi unakamilika kwa wakati."