Maboma Yaliyojengwa Kwa Nguvu za Wananchi Yatakiwa Kukamilika

Imewekwa: October 29th, 2022

Mwenyekiti wa Bodi ya Afya  ya Halmashauri ya wilaya ya Bukombe Ndg. Kelvin Makonda ameutaka uongozi wa Idara ya afya  kuhakikisha maboma 51 ya zahanati pamoja na vituo vya afya yaliyojengwa kwa nguvu za wananchi yanakamilika ili yaweze kutoa huduma kwa wananchi.

"Wananchi wetu wamejitolea nguvu zao ili waweze kupata huduma za afya karibu. Kwa kutumia vyanzo vyetu vya ndani maboma haya tuyape kipaumbele ili yaweze kukamilika."

Makonda ameyasema hayo tarehe 29 Oktoba, 2022 wakati wa kikao cha Bodi ya Afya ya Halmashauri kwa ajili ya kupitia na kujadili taarifa za utekelezaji kwa kipindi cha robo ya kwanza julai - septemba kwa mwaka wa fedha 2022/2023.

Akijibu hoja ya upungufu wa watumishi katika vituo vya kutolea huduma za afya Mganga Mkuu wa Wilaya ya Bukombe Dr.Deograsia Mkapa amesema kwa mwaka wa fedha 2021/2022 serikali kupitia Tawala za Mikoa na Serikali za Mitaa (TAMISEMI) imeajili watumishi 53 wa sekta ya afya na tumekwisha wapanga kwenye vituo kulingana na mahitaji yaliyopo.  Hata hivyo bado tunaendelea kuiomba serikali iendelee kutupatia watumishi.

Vile vile  aliendelea kusema kuwa kwa upande wa upatika wa dawa na vifaa tiba kwa mwaka wa fedha 2022/2023  kwa kipindi cha robo ya kwanza  ni asilimia 93 na wananchi wetu wanaendelea kupata dawa salama na zilizo na ubora kwa wakati.

Katika taarifa ya utekelezaji wa shughuli za lishe  alisema halmashauri imeendelea kutekeleza shughuli za lishe ambapo jumla ya shilingi milioni 13 zimetumika na tumefanikiwa  kuwafikia watoto 65,408 wenye umri kuanzia miezi 6 hadi 59 ambao wamepatiwa Matone ya nyongeza ya vitamini A sawa na asilimia 108 zaidi ya lengo la watoto 60,588 waliotakiwa kufikiwa.

Akiongea kwa niaba ya Mkurugenzi Mtendaji  Dr.Mkapa aliwajulisha wajumbe wa bodi ya afya kuwa bodi imemaliza muda wake.

"Bodi ya afya imemaliza muda wake  tunawashukuru kwa kuhudumu na sisi kwa muda wa miaka mitatu na tunawakaribisha kuomba tena ili muweze kuhudumu kwa kipindi kingine."

Katika kikao hicho taarifa zilizojadiliwa ni pamoja na utekelezaji wa shughuli za Idara ya afya kwa kipindi cha Julai - Septemba, 2022 pamoja na mikakatia ya Idara ya afya, ustawi wa jamii na lishe kwa mwaka wa fedha 2022/2023.