Mhe.Silinde aipongeza Bukombe kwa usimamizi mzuri wa miradi ya maendeleo.

Imewekwa: July 23rd, 2021

 Naibu Waziri Ofisi ya Rais Tawala za Mikoa na Serikali za Mitaa Mhe. David Silinde ameupongeza Uongozi wa halmashari ya Wilaya ya Bukombe kwa usimamizi mzuri wa miradi ya maendeleo yakiwemo madarasa, mabweni, Bwalo la chakula pamoja na ujenzi wa barabara kwa kiwango cha lami nyepesi yenye urefu wa km 200.

"Kama hapa tu tumekaa kwenye bwalo, hii pekee yake inatosha kuniambia kuwa nikienda kwenye mabweni mambo ni mazuri. Hongereni sana."

Pongezi hizo amezitoa tarehe 22 Julai, 2021 akiwa katika ziara ya siku moja Wilayani Bukombe.

Aidha amesema changamoto ya upungufu wa vyumba vya madarasa ni janga la kitaifa hivyo Mhe.Rais wa Jamhuri ya Muungano wa Tanzania Samia Suluhu Hassan amekwishatoa kiasi cha shilingi Bilioni 125 kwa ajili ya kumalizia maboma 10,000 na ametafuta fedha nyingine kwa ajili ya shule 1000 mpya za sekondari.

" Katika shule mpya 1000 awamu ya kwanza tutajenga shule 300, awamu ya pili shule 400 na awamu ya tatu tutamalizia kwa shule 300."

Mhe.Silinde amemtaka Mkuu wa Wilaya ya Bukombe Mhe.Saidi Nkumba kuendelea kuwahamasisha wananchi kushiriki katika utekelezaji wa miradi ya maendeleo ya kuanzisha maboma pamoja na uanzishaji wa majengo ya shule mpya.

"Halmashauri ya Wilaya ya Bukombe ina historia nzuri ya ufaulu mzuri wa shule za msingi hakikisheni mnaanzisha maboma pamoja na shule mpya za sekondari ili watoto wetu wapale mahali pazuri pa kujifunzia."

Vile vile Mhe.Silinde amemtaka Meneja wa TARURA Wilaya ya Bukombe Eng.Africano Orota kuhakikisha anasimamia vizuri ujenzi wa barabara ili kutomkatisha tamaa Mhe.Rais.

"Kwa upande wa barabara Mhe.Rais ametoa fedha moja kwa moja kwa kila jimbo awamu ya kwanza Milioni 300 na awamu ya pili Bilioni 1. Mkasimamie vizuri ili tusimkatishe tamaa Mhe. Rais ili mwaka mwingine wa fedha aweze kutupatia fedha nyingi zaidi."

Akisoma taarifa fupi ya Wilaya ,Mkuu wa Wilaya ya Bukombe Mhe.Said Nkumba amesema halmashauri ya Wilaya ys Bukombe inakabiliwa na changamoto ya upungufu wa vyumba vya madarasa, matundu ya vyoo, vifaa vya maabara, nyumba za walimu, walimu wa sayansi kwa shule za sekondari na walimu wa shule za msingi.

 Aidha ameiomba Serikali ya awamu ya sita kuendelea kuajili walimu wa kutosha ili kukabiliana na changamoto ya upungufu wa walimu kwa shule za msingi na waalimu wa sayansi kwa shule za sekondari.

Mhe.Naibu Waziri akiwa Wilayani Bukombe amekagua miundombinu ya shule ya sekondari Bukombe yakiwemo madarasa, Mabweni, Bwalo la chakula pamoja na ujenzi wa barabara kwa kiwango cha lami nyepesi Ushirombo Mjini.