Michezo ni Afya

Imewekwa: February 11th, 2023

Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewataka watumishi wote pamoja na wananchi kushiriki katika shughuli za michezo kwani micheno ni njia rahisi ya kupambana na magonjwa.

" Tunaposhiriki katika michezo miili  yetu inakuwa imara na tunaweza kupambana na magonjwa yasiyoambukiza, matatizo ya kiakili pamoja na msongo wa mawazo."

Lutengano ameyasema hayo leo tarehe 11 Februari, 2023 wakati wa mechi ya kirafiki kati ya timu ya watumishi wa Idara ya Afya na timu ya Kurugenzi (Veteran).

Naye Mganga Mkuu wa Wilaya ya Bukombe Dr. Deograsia Mkapa ambaye ni mdhamini wa timu  ya Idara ya Afya amesema timu yake ipo vizuri na ipo tayari tena kukabiliana na timu  yoyote ndani ya Wilaya pamoja na nje ya Wilaya ya Bukombe.

Aidha aliendelea kusema kuwa " Sisi watumishi wa Idara ya Afya hatupo tu kwa ajili ya kutoa huduma za afya bali na katika mashindano ya michezo tupo vizuri na nyinyi wote ni mashahidi."

Kwa upande wake Afisa Michezo Wilaya Jenipher Kisusi aliwashukuru wadhamini wa michezo kwa kuona umuhimu wa kudhamini michezo ya watumishi na aliwaomba wakuu wa Divisheni na Vitengo kudhamini mashindano ya watumishi katika Idara zao ili kuleta motisha mahali pa kazi.

Timu iliyoibuka kidedea katika mechi hiyo ya kirafiki ilikuwa  timu ya Idara ya Afya iliyofunga gori nne na kupatiwa zawadi ya mipira miwili pamoja na seti moja ya jezi na timu ya Kurugenzi (veteran) iliambulia magoli mawili na  kupatiwa zawadi ya mpira mmoja pamoja na set moja ya jezi.