Mil 400 kujenga miundombinu kituo cha afya Uyovu wilaya ya Bukombe

Imewekwa: March 8th, 2018

Halmashauri ya wilaya ya Bukombe imepokea jumla ya Tsh.400,000,000/= kutoka Ofisi ya Rais Tawala za Mikoa na Serikali za Mitaa kupitia udhamini wa Benki ya Dunia kwa ajili ya maboresho ya Kituo cha Afya Uyovu ili kiweze kutoa huduma ya upasuaji wa dharula kwa kinamama wajawazito. Hii ikiwa ni awamu ya pili ya mpango wa serikali wa maboresho ya vituo vya kutolea huduma za Afya.

Fedha hizi zimelenga kujenga Wodi ya Wazazi (Maternity ward) 1, Wodi ya Watoto (Paediatric ward) 1, Maabara (Laboratory) 1, Nyumba ya Mtumishi (Staff House) 1, Jengo la Kliniki ya Baba, Mama na Mtoto (Reproductive and Child Health Clinic (RCH) ) 1.

Fedha hizo pia zitatumika kujenga chumba cha kuhifadhia Maiti (Mortuary room) 1, njia ya kupitia kuunganisha wodi na Theatre (Walkway) na kukarabati jengo la Upasuaji (Theatre) 1, jengo la kufulia nguo (Laundry).

Zoezi la ukarabati wa kituo cha Afya Uyovu limeanza rasmi mwishoni mwa mwezi Januari mara baada ya Bodi ya Zabuni ya Halmashauri na Kamati ya fedha, Uchumi na Mipango kuridhia matumizi ya pesa hizo kwa mfumo wa "Force akaunti" yaani kutekeleza mradi huo kwa kutumia mafundi wa jamiiili kuweza kupata thamani halisi ya pesa iliyotolewa.

Katika kuhakikisha ujenzi wa miundombinu hii ya afya inakuwa katika kiwango cha ubora wa hali ya juu,Kamati ya ujenzi ambayo wajumbe wake ni wananchi wa kata ya Uyovu wakishirikiana na wataalamu kutoka Halmashauri kushiriki katika ujenzi huo kwa kufyatua matofali katika kituo hicho ili kuweza kudhibiti ubora wa tofalil zinazotumika katika ujenzi pamoja na uimara wa majengo yanayojengwa.

Hatua mbalimbali za ujenzi wa miundombinu hii imefikiwa ambapo Wodi ya watoto ipo hatua ya kufungwa mkanda kwenye madirisha,jengo la maabara lipo hatua ya usawa wa lenta,Nyumba ya mtumishi ipo hatua ya usawa wa kufunga lenta ya mwisho,jengo la kliniki ya baba mama na mtoto limefikia hatua ya kufunga mkanda wa Madirisha.

Kituo Cha Afya Uyovu kinahudumia wananchi takribani elfu 92,464 idadi hii ambayo haiendani na uhalisia wa huduma zilizopo kwani inawalazimu wagonjwa wengine kupelekwa Hospitali ya wilaya ambayo ipo umbali wa kilomita 46 ili kupatiwa huduma.

 Hii imepelekea Ofisi ya Rais Tawala za Mikoa na Serikali za Mitaa (TAMISEMI) kutenga na kupeleka fedha kata ya Uyovu ili kuboresha huduma za Afya na kusogeza huduma hiyo karibu zaidi na wananchi.

Ujenzi wa Jengo la Nyumba ya mtumishi lipo hatua ya usawa wa kufunga lenta ya mwisho.

Ujenzi wa Jengo la Wodi ya watoto kata ya Uyovu umefikia hatua ya kufungwa mkanda kwenye madirisha.

Ujenzi wa Jengo la maabara Kituo cha Afya Uyovu lipo hatua ya Lenta.

Ujenzi wa Jengo la kliniki ya Baba ,mama na Mtoto limefikia hatua ya kufunga mkanda wa Madirisha.