Milioni 141 chenji ujenzi wa madarasa Bukombe.

Imewekwa: December 29th, 2021

Leo Disemba 29, 2021 Halmashauri ya wilaya ya Bukombe imekabidhi Madarasa Mapya 107 yenye thamani ya Bilioni 2.1 chini ya Mpango wa Maendeleo na Ustawi wa Taifa na Mapambano dhidi ya Uviko 19 kwa Mkuu wa Mkoa wa Geita Mhe. Rosemery Senyamule.

Akizungumza kwenye hafla ya makabidhiano iliyofanyika kwenye shule ya Sekondari Katente, Mhe. Senyamule ameupongeza uongozi wa Wilaya hiyo kwa Usimamizi uliofanikisha kukamilisha ujenzi wa Madarasa kwenye ubora unaokusudiwa.

Aidha, amewapongeza kwa uadilifu na uaminifu wa kubana matumizi uliopelekea kubakisha fedha kiasi cha Tshs. Milioni 141.5 kwenye manunuzi na Ujenzi wa Madarasa hayo chini ya usimamizi wa viongozi ngazi ya Wilaya, Halmashauri na wakuu wa Shule kwa kushirikiana na kamati za ujenzi.

"Naomba niwahakikishie ndugu wananchi, majengo haya yana ubora unaokusudiwa, kamati mbalimbali za Mkoa na Halmashauri zimepita kukagua maendeleo ya ujenzi wa madarasa haya kuanzia kwenye ngazi za awali kabisa ya Ujenzi hadi kufikia hapa." Mkuu wa Mkoa.

"Hongereni sana Bukombe, hii ni miongoni mwa wilaya ambayo imefanya vizuri sana, naomba tusije baada ya mwaka mmoja tukute darasa limekua na rangi ya maziwa badala ya nyeupe, walimu mna kazi kubwa kuwaelekeza wanafunzi kutunza madarasa haya tuwafundishe maadili na uzalendo ikiweno kulinda rasimali." Mkuu wa Mkoa.

"Nipongeze leo nimepanda mti wa matunda wa mparachichi kwenye uzinduzi huu, jambo hili limenikumbusha jambo moja kwamba chakula bora ni pamoja na matunda hivyo basi shule zote tunao wajibu wa kupanda miti ya matunda ili kuboresha lishe kwa wanafunzi." Senyamule.

Vilevile, Mhe. Mkuu wa Mkoa ametembelea na kuona madarasa yaliyokamilika kwenye shule za Sekondari Runzewe, Msasa, Businda ambapo amepongeza juhudi kubwa iliyotumika kukamilisha ujenzi wa madarasa kwenye shule hizo ambao utasaidia kupunguza msongamano kwa wanafunzi madarasani.

"Mhe. Mkuu wa Mkoa, kwenye mradi huu Wilaya ya Bukombe tutabakiza fedha Tshs. Milioni 141.5 na fedha hizi zote zilizobaki zitaombewa kibali maalum cha kuzitumia kwenye maeneo ya shule husika." Amesema Mkuu wa Wilaya ya Bukombe, Mhe. Said Mkumba.

Katika nyakati tofauti, Mwenyekiti na Mkurugenzi mtendaji wa Halmashauri ya Wilaya ya Bukombe wamewawashukuru na kuwapongeza watumishi, wadau na wananchi wote walioshiriki kufanikisha Bilioni 2.1 zinatumika kama ilivyokusudiwa.

Awali, Mkuu wa Mkoa wa Geita, Mhe. Rosemary Senyamule amefanya ziara kwenye mradi wa Maji Nampahalahala unaogharimu Tshs. Bilioni 1.1 ambao mwezi Januari 2022 utakapokamilika utahudumia wananchi 6,108 kwa kuwapatia maji safi na salama na kuwaepusha na kupata maradhi ya kuhara, Kipindupindu na homa ya matumbo.

Aidha, Mhe. Mkuu wa Mkoa amesema chanzo hicho cha Maji kinapaswa kulindwa kwa kupanda miti ili maji hayo yaweze kuongezeka kutokana na uwepo wa uoto wa asili pamoja na miti ya kupandwa.

Paulo Zahoro

Geita RS.