Miongozo Ikalete Mabadiliko Chanya

Imewekwa: September 23rd, 2022

Mkuu wa Wilaya ya Bukombe Mhe Said Nkumba amewataka wakuu wa shule, walimu wakuu pamoja na wadau wa elimu kuhakikisha wanaleta mabadiliko chanya katika shule za msingi na sekondari kupitia Miongozo ya Uboreshaji wa Elimu.

"Hakikisheni mnasimamia masuala ya ufundishaji na ujifunzaji kupitia Miongozo ya Uboreshaji wa elimu ya Msingi na Sekondari ili iweze kuleta mabadiliko chanya ya kututoa hatua moja na kutupeleka hatua nyingine."

Nkumba ameyasema hayo wakati wa zoezi la uzinduzi wa Miongozo ya Uboreshaji wa Elimu ya Msingi na Sekondari katika halmashauri ya Wilaya ya Bukombe.

Akiongea katika zoezi hilo Kaimu Afisa Elimu Msingi Wilaya Kassim Mussa amesema Serikali imekuwa ikifanya jitihada mbalimbali katika kukabiliana na changamoto zinazoikabili sekta ya Elimu nchini. Katika mwaka wa fedha 2022/2023 Serikali imeandaa na kuzindua Miongozo ya Uboreshaji wa elimu ambayo ni Mkakati wa kuimarisha ufundidhaji na ujifunzaji ngazi ya elimu Msingi, Mwongozo wa Uteuzi wa Viongozi wa Elimu katika Mamlaka za serikali za Mitaa na Changamoto katika Uboreshaji wa Elimu Msingi na Sekondari, Nini kifanyike?

Kwa upande wake Mkuu wa shule ya sekondari Busonge ameishukuru serikali kwa kutoa miongozo ya elimu kwani itakuwa ni dira ambayo itasaidia kuleta ufanisi wa kazi katika shughuli zetu za kila siku.

Halmashauri ya Wilaya ya Bukombe ina jumla ya shule za Msingi 94 za serikali 89 na binafsi 5 zenye jumla ya wanafunzi 106157 wavulana wakiwa ni 52468 na wasichana 53689 na shule za sekondari 23 za serikali 19 na binafsi 4 zenye jumla ya wanafunzi 15989 wavulana wakiwa 8140 na wasichana 7849.

#Kasi ya Samia Bukombe
#Kazi Iendelee.