MKANDARASI ATAKIWA KUKAMILISHA MRADI WA MAJI KWA WAKATI-MENEJA RUWASA

Imewekwa: February 11th, 2024

Meneja wa Wakala wa Maji na Usafi wa Mazingira Vijijini RUWASA Mkoa wa Geita Mhandisi Jabiri Kayilla amemuagiza Mkandarasi anayetekeleza Mradi wa Maji Namsega uliopo Wilayani Bukombe kuhakikisha anakamilisha mradi huo kwa wakati ili uanze kutoa huduma kwa wananchi.

"Mradi huu tunatarajia kuukabidhi kwa wananchi ifikapo tarehe 30 Februari, 2024. Ninamuagiza Mkandarasi  kufanya ukamilishaji wa maeneo madogomadogo yaliyobaki ili mradi uanze kufanya kazi."

Maagizo hayo ameyatoa tarehe 10 Februari, 2024 wakati wa ziara ya kutembelea mradi huo uliohusisha Mameneja wa Maji Wilaya, Wakurugenzi wa Mamlaka za Maji, Wakurugenzi wa Mabonde ya ziwa Tanganyika na ziwa Victoria na Maafisa wa Ubora wa Maji Kanda ya ziwa.

Akisoma taarifa ya mradi huo Meneja RUWASA Wilaya ya Bukombe  Mhandisi James Benny alisema mradi wa maji Namsega unatekelezwa na Mkandarasi  Yajuk Investment Co Ltd kupitia Programu ya Malipo Kulingana na Matokeo.

Aidha aliendelea kusema kuwa  mradi huo umehusisha ujenzi wa "Power house",  Uunganishaji wa umeme wa gridi, ufungaji wa Pampu ya kusukuma maji, ujenzi wa tanki la maji pamoja na ujenzi wa vituo 12  vya kuchotea maji.

Kwa upande wake Diwani wa Kata ya Runzewe Magharibi Mhe.John Nguhi ametoa wito kwa wananchi wa eneo lake kuhakikisha wanatunza na kulinda miundombinu ya maji ili iweze kuwa endelevu na kutoa huduma bora kwani kwa kufanya hivyo huduma ya maji safi na salama itakuwa endelevu kwa kizazi cha sasa na cha baadaye.

Jumla ya wananchi12,850 na vijiji 3 ambavyo ni Namsega, Kazilamuyaye na Msangila watanufaika na mradi wa maji Namsega wenye thamani ya shilingi 954,778,618.69.