Mmekitendea haki Chama Cha Mapinduzi - Matondo

Imewekwa: September 22nd, 2023

Mwenyekiti wa Chama Cha Mapinduzi (W) Ndg. Matondo Kuhanga Lutonja amewapongeza Wakuu wa Divisheni na Vitengo wa Halmashauri ya Wilaya ya Bukombe kwa kukitendea haki Chama Cha Mapinduzi hasa katika Utekelezaji wa miradi ya maendeleo.

" Hongereni kwa utekelezaji mzuri wa miradi ya maendeleo, mmetufanya tutembee kifua mbele, mmetusaidia sana kutekeleza Ilani ya chama chetu."

Matondo ameyasema hayo wakati wa kikao cha Kamati ya Siasa  Wilaya cha  utekelezaji wa Ilani ya Uchaguzi 2020 - 2025 kwa kipindi cha Januari - Juni 2023 Kilichoketi tarehe 20 Septemba, 2023.

Kwa upande wake Diwani wa Kata ya Ng'anzo Mhe. Mashaka Shing'wenda amemshukuru Mhe Rais kwa kuwaletea kiasi shilingi 125,000,000 /= kwa ajili ya ukamilishaji wa Zahanati ya Ng'anzo na ujenzi wa nyumba 2 za walimu katika shule za sekondari Ng'anzo kwa kipindi cha Januari - Juni 2023.

Aidha Mkuu wa Wilaya ya Bukombe Mhe. Said Nkumba alisema  kwa mwaka wa kilimo 2023/2024 halmashauri imejipanga kuhakikisha mawakala wanawafikishia wakulima mbolea za ruzuku katika maeneo yao na kuhakikisha wakulima wanajisajili kwa ajili ya kupata ruzuku hiyo.

Naye Mkurugenzi Mtendaji wa Halmashauri ya Wilaya ya Bukombe Lutengano Mwalwiba  alisema kwa kipindi cha Januari - Juni 2023 halmashauri ya Wilaya ya Bukombe ilipokea jumla ya kiasi cha shilingi 10,644,025,035 /= ikiwa ni fedha za maendeleo ndani ya bajeti na kiasi cha shilingi 4,479,997,267 /= ikiwa ni fedha za maendeleo nje ya bajeti.