MRADI WA MAJI MWALO NA NAKAYENZE UKAMILIKE KWA WAKATI-DC MURAGILI

Imewekwa: May 16th, 2024

Mkuu wa Wilaya ya Bukombe Mhandisi Paskasi Damian Muragili ameitaka kampuni ya D4N COMPANY LTD ya Kahama kuhakikisha inakamilisha mradi wa maji Mwalo na Nakayenze kwa wakati ili mradi huo uanze kutoa huduma bora kwa wananchi.

"Wananchi wa Mwalo na Nakayenze wanahitaji maji safi na salama hakikisheni mradi huu unakamilika kwa wakati."

Muragili ameyasema hayo leo tarehe 16 Mei, 2024 wakati wa ziara yake ya kukagua miradi ya maendeleo pamoja na kusikiliza na kutatua kero za wananchi katika kata ya Ushirombo.

Kwa upande wake  Msimamizi wa mradi  Mhandisi Lung'wang'wa Magulu amesema mradi huu utapunguza muda uliokuwa unatumika kufuata maji mbali ambapo sasa utatumika kufanya shughuli za kiuchumi,

Lung'wang'wa ameendelea kusema kuwa mradi  utapunguza uwepo waagonjwa yanayotokana na matumizi ya Maji yasiyo safi na salama kama vile kuhara, homa ya matumbo na kipindupindu na kuwasaidia watoto wa shule kujipatia muda wa kutosha kujisomea badala la kutumia muda mwingi kwenda mbali kutafuta maji.

Mradi wa maji Mwalo Nakayenze ni moja ya miradi inayotekelezwa kwa programu ya Malipo kulingana na Matokeo ( PfR) kwa gharama ya kiasi cha shilingi 1,301,181,687.40  katika vijiji vya Mwalo na Nakayenze. Kwa mujibu wa mkataba mradi huu ulianza kutekelezwa tarehe 20/12/2023 na unatarajia kukamilika tarehe 19/8/2024. Aidha mradi ukikamilika unatarajia kuhudumia wakazi wapatao 2, 380 katika kijiji cha Mwalo na 2,287 katija kijiji cha Nakayenze.