Mwangaza theatre group kunufaisha wana Bukombe

Imewekwa: July 10th, 2018

Kikundi cha Mwangaza theatre Group kimeanzishwa rasmi mwaka 2011 kikiwa kimelenga  kuelimisha jamii  ya Bukombe katika masuala ya uzazi wa mpango, Malaria, Ukimwi na madhara yake pamoja na mbinu za kujikinga, wilaya ya Bukombe inashika nafasi ya pili kati ya tano kwa takwimu za mkoa wa Geita juu ya maambukizi ya virusi vya ukimwi, kikundi hiki kinawafikia wananchi kijiji kwa kijiji kutoa elimu ya afya kwa kujitolea.

Pia kikundi  hiki kimelenga kuongeza mwamko katika jamii dhidi ya ugonjwa  wa Ukimwi na kutokomeza maambukizi mapya ya virusi hivyo na kuboresha afya za wakazi wa wilaya ya Bukombe kwakuwa na mpango endelevu wa jitihada za kukabiliana na Ukimwi na magonjwa ya ngono kwa  kuishauri jamii na kushawishi upimaji wa hiyari ,pia kuboresha afya ya mama wajawazito na watoto chini ya muri wa miaka 5 ili kupunguza vifo.

Kikundi  cha Mwangaza katika chai wake kimepata bahati ya kupata ushirikiano kutoka serikalini na taasisi zisizo za kiserikali kama  vile AMREF,CARE INTERNATIONAL,TACAIDS ,TCDC(Tanzania Communication and Development Center),ofisi ya Mkurugenzi Mtendaji wa Halmashauri kupitia idara  zake za maendeleo ya jamii na IMA WORLD HEALTH  FUND(Mradi wa Lishe mtoto mwerevu).

Aidha utekelezaji wa mradi umefikia kata 17 wilayani Bukombe ambapo imeweza kutoa elimu kwa jamii kupitia mikutano ya hadhara ,kutoa elimu ya mabadiliko ya kitabia kwa  jamii na kufanya tathmin na ufuatiliaji wa shughuli za mradi serikalini kupitia vitengo husika ndani ya idara ya Afya.

Akizungumza katibu wa kikundi hicho amesema kikundi kimeweka mikakati mbalimbali ya kutoa elimu kwenye mikutano, shuleni, kanisani, misikitini, hospitalini na kwenye maeneo ya masoko na kuomba vitendea kazi kutoka TCDC kama baiskeli na pikipiki,”jamii imeanza kuwa na mwitikio chanya juu ya malaria,afya ya uzazi wa mpango na virusi vya Ukimwi,  imesaidia kuleta mabadiliko chanya ya kitabia kwa wananchi, naamini tumeanza kufikia lengo”alisema katibu wa kikundi Mkala.

Mwenyekiti wa Kikundi cha Mwangaza akifungua kikao cha mipango mikakati ya kuendelea kuelimisha wana Bukombe.

Wanakikundi cha Mwangaza Theatre Group wakiwa katika kikao cha kujadili namna ya kutekeleza mikakati mbalimbali waliojiwekea.