MWENGE WA UHURU WAWEKA JIWE LA MSINGI MRADI WA MAJI MWALO - NAKAYENZE

Imewekwa: October 2nd, 2024

Kiongozi wa Mbio za Mwenge wa Uhuru Kitaifa Ndg. Godfrey Mnzava tarehe 01 Oktoba, 2024 ameweka Jiwe la Msingi katika Mradi wa Maji uliopo kitongoji cha Mwalo Kata ya Ushirombo Wilayani Bukombe ambapo umegharimu kiasi cha shilingi 1,301,181,687.40

Mradi huo ambao unatekelezwa na Wakala wa Maji na Usafi wa Mazingira (RUWASA) unatarajia kuhudumia wananchi wapatao 4,667 katika vijiji vyote viwili.

Awali akiweka Jiwe la Msingi katika Mradi huo, Mnzava alisema kuwa ameridhishwa na mradi huo baada ya kukagua miundombinu na nyaraka zote hivyo Mwenge wa Uhuru umejiridhisha pasipo na shaka yoyote.

“Ningependa kuona Mradi huu unakamilika kwa wakati uliokusudiwa ili uweze kuwa na tija kwa wananchi na wote tushirikiane kutunza miundombinu hii ya maji ili iweze kudumu kwa muda mrefu”.

Akisoma taarifa ya Mradi huo mbele ya Kiongozi wa mbio za Mwenge Kitaifa, Meneja wa RUWASA(W) Muhandisi James Beny alisema kuwa Mradi huo wa maji ulianza Disemba 2023 na unatarajiwa kukamilika Oktoba 2024.

Mradi huo unahusisha ujenzi wa nyumba ya Nishati, ufungaji wa pampu yenye uwezo wa kusukuma lita 4,600 kwa saa, uunganishaji wa umeme kutoka gridi ya Taifa, ujenzi wa tanki la maji lenye ujazo wa lita 75,000, uchimbaji na ulazaji wa mabomba yenye urefu wa kilomita 15.9 pamoja na ujenzi wa vituo 7 vya kuchotea maji.