Nape Nnauye ahaidi kupanda nyasi uwanja wa michezo Wilayani Bukombe- Kilimahewa

Imewekwa: September 11th, 2022

Waziri wa habari, mawasiliano na tekinolojia ya habari Mhe. Nape Nnauye ameahidi kupanda nyasi uwanja wa michezo unaomilikiwa na Halmashauri ya Wilaya ya Bukombe kwa kuweka nyasi pamoja na kutengeneza eneo kwaajili ya viongozi na mashabiki watakao kuwa wakihudhuria mashindano mbalimbali uwanjani humo.

Ameyasema hayo alipokuwa akikabidhi zawadi katika mashindano ya  fainali ya Doto cup yaliyofanyika katika uwanja wa Halmashauri ya Wilaya ya Bukombe- Kilimahewa.

"Kutokana na mchezo mzuri na hamasa nzuri niliyoikuta hapa, Mimi na Mhe. Doto  Biteko tutapambana na  tutahakikisha mashindano yajayo ya Doto cup ya mwaka 2023 uwanjani hapa patakuwa na nyasi, lakini pia tutatengeneza maeneo kwa ajili ya kukaa viongozi na mashabiki watakao hudhuria mashindano hayo" amesema Mhe. Nape Nnauye.

Aidha Mhe. Nnauye amewataka vijana kuwa na tabia ya kufanya mazoezi Mara kwa mara na kutumia vipaji vyao kujiajiri.

Nae Waziri wa madini na Mbunge wa Jimbo la Bukombe Mhe. Doto  mashaka Biteko ambaye pia ni mdhamini wa mashindano hayo amemshukuru Mhe. Nape Nnauye pamoja na viongozi wote waliohudhuria fainali ya Doto cup 2022.

Pia amewapongeza washindi na washiriki wote wa Doto  cup bila kuisahau kamati ya maandalizi ya mashindano ya Doto cup 2022 kwa kazi nzuri waliyoifanya hadi kukamilika kwake.

"Nawashukuru sana wote mliohusika kuandaa zoezi hili, nyie ndio mnajua kilakitu kuhusiana na maandalizi yote ya mashindano, inaonesha jinsi gani watu wa Bukombe ni welevu na wachapa kazi." Amesema Mhe. Biteko.
Dr. Biteko ameomba ushirikiano na uchapa kazi huo kwa vitendo uendelee na uwe tamaduni ya wana Bukombe siku zote.

Fainali ya Doto cup iliambatana na michezo mbalimbali  ikiwemo mashindano ya kukimbiza kuku, mbio za mita mia moja, kuvuta kamba, kukimbia na magunia, kaleti, mpira  wa Pete pamoja na mpira  wa miguu ambapo timu iliyochukua ubingwa katika mpira wa miguu ilikua ni timu ya Butinzya scorpion football club.

Zawadi zilizotokewa kwa mshindi wa kwanza ambapo ni timu ya Butinzya scorpion football club ilikua ni fedha taslim za kitanzania shilingi milioni moja, jezi kamili seti tatu pamoja na mipira mitatu. Mshindi wa pili ambapo ni timu ya Runzewe Academy Walijipatia fedha taslim za kitanzania shilingi laki tano, seti kamili za jezi mbili, pamoja na mipira mitatu, na kwa mshindi wa tatu ambapo ni timu ya Warrior ushirombo  ilijipatia fedha taslim shilingi laki moja, Seti kamili ya jezi pea moja pamoja na mpira mmoja. Aidha washindi wa timu zote tatu walizawadiwa medali kwa kila mshiriki.

Afisa michezo Wilaya ya Bukombe, Jenipha Kisusi alisema halmashauri imejipanga kutunza miundombinu ya uwanja ikiwa ni miongoni mwa vyanzo vya mapato ya ndani.

Kisusi aliwaomba wananchi kupenda mazoezi hali ambayo itawasaidia kuimarisha mwili na afya zao na kuweza kuepuka magonjwa nyemelezi.

Mwisho.