Nitakuwa Mstari wa Mbele Kuhakikisha Ninalinda Haki za Wanawake

Imewekwa: March 8th, 2023

"Nitakuwa mstari wa mbele  kuhakikisha ninalinda haki za wanawake katika kushika nafasi za uongozi, kupinga vitendo vya ukatili na kuhakikisha haki za msingi za binadamu zinapatikana katika jamii nzima."

Hayo yamesemwa na Mkuu wa Wilaya ya Bukombe Mhe.Said Nkumba wakati wa sherehe za kilele cha Maadhimisho ya Siku ya Wanawake Duniani tarehe 8 Machi, 2023  katika viwanya vya Michezo Mwenge kata ya Uyovu.

Aidha Nkumba amewataka wananchi  kuwa mstari wa mbele katika kuhakikisha jamii inakuwa na matumizi sahihi ya teknolojia ambayo yanalenga kujenga tamaduni za kitanzania.

"Ndugu zangu tupo kwenye dunia ya utandawazi tuhakikishe jamii yetu inakuwa na matumizi  sahihi ya teknolojia yenye mtazamo chanya wenye kujenga tamaduni zetu ili mwisho wa siku tuweze kulinda mila na desturi zetu ili jamii iweze kuwa na kizazi  chenye kufuata maadili huku suala la usawa wa kijinsia likizingatiwa."

Kwa upande wake Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewapongeza wanawake wote Duniani katika kuadhimisha siku hii muhimu.

"Nawapongeza wanawake wote katika kuadhimisha siku hii muhimu. Wanawake mnaweza katika masuala ya uongozi na jamii kwa ujumla.Wanawake mnamioyo ya dhahabu, mapenzi ya kweli, uvumilivu na subra kwa ustawi wa utu na kuifanya Dunia kuwa sehemu salama zaidi." 

Akiongea katika Maadhimisho hayo Mkuu wa Divisheni ya Maendeleo ya Jamii Rita Kamenya amesema  Maadhimisho ya mwaka 2023  yamebeba kauli mbiu isemayo " Ubunifu na Mabadiliko ya Teknolojia: Chachu katika kuleta Usawa wa kijinsia ambapo inasisitiza  umuhimu wa mawazo ya ujasiri yenye kuleta mabadiliko na teknolojia jumuishi zenye kuleta ubunifu.

Maadhimisho ya siku ya wanawake Duniani hufanyika tarehe 8 Machi ya kila mwaka lengo likiwa ni kuongeza chachu katika harakati za mapambano katika usawa wa kijinsia kwa wanawake na wanaume katika jamii.