Nyimbo za Uzalendo ni Sehemu ya Michezo

Imewekwa: January 19th, 2023

 Kaimu Afisa Elimu Msingi Wilaya Kassim Musa kwa niaba ya Mkurugenzi Mtendaji amewaagiza Walimu wa Michezo katika Halmashauri ya Wilaya ya Bukombe kuhakikisha kila siku kabla watoto hawajaingia madaradani wanaimba nyimbo za uzalendo pamoja na kushiriki mbio za mchakamchaka.

" Hili siyo ombi ni lazima. Hakikisheni kabla wanafunzi hawajaingia madarasani wanaimba nyimbo za kizalendo na kushiriki mbio za mchakamchaka kwa sababu  ni sehemu ya michezo."

Kassimu ameyasema hayo tarehe 17 Januari, 2023 wakati wa kikao cha tathimini ya kambi ya michezo wilaya kwa  shule za msingi UMITASHUMITA 2022 kilichoketi katika ukumbi wa mikutano wa halmashauri.

Aidha amewapongeza kwa kushiriki katika kikao hicho kwani kimekuwa ni kikao cha kujenga.

" Kikao hiki ni dira yetu katika kitengo cha  michezo kwani tumeweza kutathimini wapi tumefanya vibaya na wapi tumefanya vizuri na nini kifanyike."

Vile vile amewashukuru wadau  wa michezo Benki ya NMB, CRDB na watu binafsi kwa kujitoa kwa hali na mali katika kufanikisha michezo.

" Mmekuwa wadau muhinu sana kwani mmekuwa bega kwa bega na sisi katika kufanikisha shughuli za michezo. Sisi kama Wilaya tunatambua mchango wenu."

Kwa upande wake Kaimu Afisa Utamaduni, Michezo na Sanaa Wilaya Jenipher Kisusi amewataka wakuu wa shule pamoja na walimu wa michezo kuwa wawazi katika matumizi ya fedha za michezo.

"Fedha za michezo ziwe wazi kuanzia kwenye kamati za shule na hata wanafunzi wajue. Kama hatutaweka wazi itakuwa ni vigumu kushikwa mkono na wadau.

Aidha aliendelea kusema kuwa changamoto kubwa inayoifanya wilaya kufanya vibaya kwenye mashindano ni muda mfupi wa kukaa kambini ambapo unapelekea wanamichezo kutoandaliwa vizuri.

Kikao cha Tathmini ya kambi ya michezo ya UMISHUMITA mwaka 2022 kimehusisha walimu wa michezo kwa shule za msingi, Maafisa Elimu Kata, walimu wakuu, Viongozi wa vyama vya michezo na wadau wa michezo CRDB,  NMB na watu binafsi