Program ya TAKUKURU Rafiki Yaanza Kutekelezwa Katika Kata ya Bulangwa

Imewekwa: February 28th, 2023

Taasisi ya Kuzuia na Kupambana na Rushwa (TAKUKURU) Wilaya ya Bukombe  tarehe 27 Februari , 2023 imeanza kutekeleza Program ya TAKUKURU - Rafiki katika kata ya Bulangwa  Tarafa ya Ushirombo lengo likiwa ni kuimarisha ushiriki wa jamii na wadau katika mapambano dhidi ya rushwa kwa kutambua kero,kupanga mikakati ya utatuzi, kutekeleza na hatimaye kufaidika kwa kupata suluhisho la kero.

Kamanda wa TAKUKURU Wilaya ya Bukombe Said Mhina amesema program ya TAKUKURU Rafiki  imeanzishwa ili kuongeza wigo wa ushiriki wa kila mwananchi na wadau katika kukabiliana na tatizo la rushwa katika utoaji huduma kwa jamii na utekelezaji wa miradi ya maendeleo.

Aidha Mhina  amewataka wananchi kuhakikisha  wanabaini kero zinazowaathiri katika maeneo yao na kuchaguwa waakilishi ambao watakua kiungo kati ya TAKUKURU katika kuzipatia majawabu kero hizo.

Akieleza wajibu wa mwananchi katika mapambano dhidi ya rushwa Afisa wa TAKUKURU  Barnabas Mushi  alisema program imebeba dhana ya urafiki katika kutatua kero hivyo amewataka wananchi kushirikiana na Taasisi  katika kuainisha kero zilizopo kwenye maeneo yao kwani kwa kufanya hivyo kutasaidia  kuzuia vitendo vya rushwa."

Program ya TAKUKURU Rafiki katika kata ya Bulangwa imewashirikisha viongozi wa dini, wananchi, wafanyabiashara, watumishi, wasanii, bodaboda, mafundi ushonaji na inatarajia kuzifikia  kata zote kumi na saba za halmashauri ya Wilaya ya Bukombe ili kukuza ustawi wa utawala bora.

#KUZUIA RUSHWA NI JUKUMU LAKO NA LANGU;TUTIMIZE WAJIBU WETU.