RC SHIGELA AAGIZA KUKAMILIKA KWA KITUO CHA AFYA BUFANKA

Imewekwa: June 7th, 2024

Mkuu wa Mkoa wa Geita Mhe. Martine Shigela amemuagiza Mkurugenzi Mtendaji wa Halmashauri ya Wilaya ya Bukombe kuhakikisha kituo cha Afya cha Bufanka kinakamilika kwa haraka ili kiweze kutoa huduma iliyokusudiwa.

“Kabla ya mwaka huu kuisha tuhakikishe tunakamilisha jengo hili,tengeni bajeti kwenye mapato yenu ya ndani ili tuweze kupata milioni 24 za kukamilisha kituo hiki cha Afya”.

Maagizo hayo ameyatoa tarehe 5 Mei, 2024 wakati akiongea na wananchi na viongozi mbalimbali katika ziara yake ya kukagua na kutembelea kituo cha Afya cha Bufanka kata ya Bugelenga.

Aidha Shigela amesema kuwa serikali itaendelea kutenga bajeti kwa ajili ya kununua vifaa tiba ili kuboresha huduma za Afya kwa wananchi.

“Serikali imejenga kituo hiki cha Afya ili kupunguza adha ya wananchi kutembea umbali mrefu kufuata huduma bora za Afya hasa nyakati za usiku”.

upande wake Mkuu wa Wilaya ya Bukombe Mhe. Damian Muragili amewataka wananchi kujenga vyoo bora na kuvitumia ili kujikinga na kuepukana na magonjwa ya mlipuko kama kipindupindu.

“Kila familia inatakiwa kujenga choo bora ili tuwe na jamii yenye afya njema, ni aibu kwa familia kutokuwa na choo bora na kujisaidia katika maeneo yasiyo rasmi”.

 Naye Diwani wa kata ya Bugelenga Mhe. Donald lubigisa ameishukuru serikali ya awamu ya sita kwa kuendelea kutekeleza miradi ya maendeleo katika kata yake.