RUDINI KWENYE MAENEO YA MAKAZI YALIYOTENGWA NA SERIKALI-DC MURAGILI

Imewekwa: August 24th, 2024

Mkuu wa Wilaya ya  Bukombe Mhandisi Paskasi Muragiri amewataka wananchi waliovamia Msitu wa Hifadhi ya Biharamulo - Kahama kuhakikisha wanahamia kwenye maeneo yaliyotengwa na Serikali bila kuathiri shughuli zao za kiuchumi.

"Serikali imetoa miezi mitatu kuanzia leo kuhakikisha mnahamia katika maeneo hayo mapya yaliyotengwa ili kupisha shughuli za uhifadhi."

Muragili ameyasema hayo tatehe 24 Agosti, 2024 wakati akiongea na wananchi hao katika kata ya Busonzo kijiji cha Idoselo.

Aidha ameitaka Idara ya Ardhi kwa kushirikiana na Wakala wa Huduma za Misitu Tanzania (TFS) kuhakisha wanawagawia wananchi hao maeneo kwa kufuata misingi ya haki na siyo kutengeneza migogoro.

Aliendelea kusema  kuwa Serikali imekwishatenga eneo la  hifadhi lenye ukubwa wa hekta 5693.7 na Halmashauri imekwisha andaa mpango wa matumizi bora ya ardhi.

Kwa upande wake Afisa Maendeleo ya Ardhi na Makazi Wilaya Agustino Simbeye alisema, Idara ya Ardhi kwa kushirikiana na watumishi wa Wakala wa Huduma za Misitu (Shamba la Miti Silayo) wamefanikisha kupima jumla ya viwanja vya makazi 457 pamoja na kutenga maeneo ya huduma za kijamii.

Kuwatengea maeneo  ya makazi vijiji vilivyobainishwa kuwepo ndani ya hifadhi ya Biharamulo - Kahama  ni maagizo ya Serikali ya kuhakikisha wananchi wanaishi bila kubughudhiwa na shughuli za uhifadhi.