Saidi Kalidushi Aridhishwa na Ujenzi wa Miradi ya Uviko-19.

Imewekwa: January 15th, 2022

Mwenyekiti wa CCM Mkoa wa Geita Said Kalidushi ameridhishwa na ujenzi wa miundombinu ya madarasa ya elimu msingi na sekondari yaliyotekelezwa na fedha za Mpango wa Maendeleo na Ustawi wa Taifa na Mapambano dhidi ya UVIKO - 19 huku akiwataka viongozi wa Wilaya ya Bukombe kuhakikisha wanaendeleza desturi yao ya kuwashirikisha wananchi katika kutekeleza miradi ya maendeleo katika miradi mingine inayoendelea kutekelezwa.

"Rai yangu kwa viongozi pamoja na wananchi endelezeni moyo huo huo wa kizalendo mliokuwanao wakati wa utekelezaji wa miradi ya UVIKO - 19 katika kutekeleza miradi mingine ya maendeleo katika halmashauri yenu." Said Kalidushi.

Hayo ameyasema tarehe 14 Januari, 2022 katika ziara ya kamati ya siasa Mkoa wa Geita ya kutembelea na kukagua miradi ya maendeleo.

Aidha aliendelea kusema kuwa madarasa ya elimu msingi na sekondari kupitia mradi wa UVIKO - 19 katika halmashauri ya Wilaya ya Bukombe yatasaidia kupunguza msongamano kwa wanafunzi ikiwa ni malengo yakupunguza maambukizi ya ugonjwa wa UVIKO - 19 nchini.

Akiongea katika ziara hiyo Mkuu wa Wilaya ya Bukombe Mhe.Said Nkumba amesema, katika utekelezaji wa Miradi ya UVIKO - 19 tumebakiza chenji ya Milioni 141 hii ni kutokana na moyo wa kizalendo walionao wananchi wa wilaya ya Bukombe kwa kushirikisha nguvu zao katika kutekeleza miradi kama vile kuleta mchanga, mawe, maji, kusomba kokoto, kuchimba msingi pamoja na shughuli za umwagiliaji wa majengo yetu.

Vile vile ameupongeza uongozi wa Halmashauri ya Wilaya ya Bukombe kwa kutoa kiasi cha shilingi Milioni 10.5 kwa ajili ya ukarabati wa machinjio ya Katente baada ya kamati ya siasa Mkoa kuifunga kwa muda machinjio ya Mwalo ambayo mazingira yake yalikuwa yanahatarisha afya za wanananchi tarehe 10 Juni, 2021 wakati wa ziara katika halmashauri hiyo.

"Nawapongeza kwa ukarabati huu kwa kufanya hivyo wananchi wameweza kupata huduma ya machinjio katika mazingira mazuri." Said Kalidushi.

Kwa upande wake Mkuu wa Mkoa wa Geita Mhe. Rosemary Senyamule amewataka wazazi kuhakikisha wanawapeleka watoto shule na mzazi atakaye kiuka atashughulikiwa kwa mujibu wa sheria.’’Tusiwapeleke watoto kwenye machimbo tuwaache wapate elimu.’’

Miradi iliyotembelewa ni pamoja na ujenzi wa vyumba viwili vya madarasa shule shikizi Migamba, ujenzi wa vyumba viwili vya madarasa shule ya sekondari Bukombe, ujenzi wa vyumba viwili vya madarasa shule ya sekondari Ushirombo, ukarabati wa machinjio ya Katente, ujenzi wa vyumba sita vya madarasa shule ya sekondari Msonga na ujenzi wa vyumba kumi vya madarasa shule ya shikizi Idoselo.