Sitahangaika na Mtoto, Nitahangaika na Mzazi

Imewekwa: January 19th, 2023

Mkuu wa Wilaya ya Bukombe Mhe.Said Nkumba amewataka wazazi/ walezi kuhakikisha wanawapeleka watoto wao shule ambao wamefikia umri wa kuanza darasa la awali na wale wote waliochaguliwa kujiunga na kidato cha kwanza kwa mwaka wa masomo 2023.

"Mtoto anayepaswa kwenda shule aende shule, sitakuwa na mswalia Mtume kwa mzazi atayekaidi agizo la kumpeleka mtoto wake shuleni."

Nkumba ameyasema hayo leo tarehe 18 Januari, 2023 wakati akiwasilisha taarifa ya utekelezaji wa Ilani ya Uchaguzi ya 2020 - 2025 kwa kipindi cha Julai - Desemba 2022 katika kikao cha  Halmashauri Kuu ya Chama cha Mapinduzi (CCM).

Aidha Nkumba amewaagiza Maafisa Tarafa pamoja na Watendaji wa Kata kuhakikisha wanawabainisha watoto wote wanaotakiwa kwenda shule.

"Tumefaulisha vizuri, tumejenga madarasa mazuri tena yenye viwango.Bainisheni watoto wote wanatakiwa kuripoti shuleni na wazazi watakaokaidi agizo la serikali watakuwa halali yangu."

Vile vile amepongeza wanafunzi, walimu na wadau wa elimu kwa kuifanya Bukombe ishike nafasi ya pili  kimkoa katika matokeo ya mtihani wa Taifa darasa la saba kwa mwaka 2022.

"Tunawapongeza walimu kwa kutuheshimisha kwani mmemefanya kazi nzuri sana na muendelee kuwa na moyo huo huo wa kizalendo."

Kwa upande wake Mwenyekiti wa kamati ya Siasa Wilaya  Matondo Kihanda Lutonja amewapongeza wakuu wa Taasisi pamoja na wakuu wa Idara kwa usimamizi mzuri wa miradi ya maendeleo.

Tumeiona miradi mikubwa mizuri katika wilaya yetu ambayo imetekelezwa kwa viwango vyenye ubora kweli mwenye macho ahambiwi tazama."

Baada ya agenda zote kukamilika Nkumba  alisema ushauri wote uliotolewa na wajumbe ameuchukua  na atahakikisha anautendea kazi kwa kushilikiana na watendaji wa serikali.