TFS Yakabidhi Madawati 100

Imewekwa: September 26th, 2022

Wakala wa Huduma za Misitu Tanzania (TFS) umekabidhi  jumla ya madawati 100 kwa Mkuu wa Wilaya ya Bukombe kwa ajili ya shule ya msingi Nakayenze na Nampalahala ambazo zinapakana na Hifadhi ya Msitu wa Biharamulo/Kahama.

Akiongea wakati wa Makabidhiano hayo kwa niaba ya Kamishna wa Uhifadhi wa Wakala wa Huduma za Misitu Tanzania Mhifadhi Misitu Wilaya Emilian Alex amesema wametoa madawati hayo ili wananchi waone umuhimu wa kutunza misitu.

"Tumetoa madawati haya ili wananchi wanaoishi kuzunguka hifadhi waone umuhimu wa kutunza misitu na kuendelea kupata faida za uhifadhi zile zinazoonekana na zisizoonekana kwa macho."

Aidha aliendelea kusema kuwa madawati hayo yamegawanywa mara mbili ambapo shule ya Msingi Nampalahala imepatiwa madawati 40 na shule ya Msingi Nakayenze madawati 60 ambapo mgawanyo huo umezingatia hali ya uhaba wa madawati kwa kila shule.

Naye Mkuu wa Wilaya ya Bukombe Mhe. Said Nkumba awewashukuru Wakala wa Huduma za Misitu Tanzania  kwa kupunguza changamoto ya uhaba wa madawati na amewataka wanafunzi kuhakikisha wanayatunza madawati hayo ili yaweze kudumu.

"Ninaamini kuwa madawati haya  yanakwenda kupunguza changamoto ya uhaba wa madawati  hakikisheni mnayatunza vizuri ili yaweze kudumu kwa muda mrefu."

Aidha amewataka wananchi kuhakikisha wanalinda maliasili pamoja na kutoa taarifa za uhalifu kwenye ngazi husika.

"Wananchi toeni taarifa za uhalifu kwenye ngazi husika kwa kuwa  sisi wote ni wanufaika wa Hifadhi za Misitu  kwa kupata maji, hewa safi na mvua."

Kwa upande wake Diwani wa kata ya Busonzo Mhe.Nicas Mayala amewataka wananchi kuacha tabia ya kuwaona Wahifadhi ni maadui pale wanapotekeleza majukumu yao.

"Wananchi wenzangu Wahifadhi si maadui bali wanatekeleza majukumu yao  kwa mujibu wa sheria, taratibu na kanuni za nchi za kulinda rasilimali  kwa ajili ya manufaa ya kizazi cha sasa na cha baadae.

Wakala wa Huduma za Misitu Tanzania (TFS) kwa niaba ya Wizara ya Maliasili na utalii inasimamia hifadhi ya Msitu wa Biharamulo/Kahama wenye ukubwa wa hekta 14,00 na unawajibu wa kusimamia rasilimali Misitu na Nyuki pamoja na kutoa huduma za ugani na msaada wa kitaalamu.