“TWENDENI TUKAANZISHE UFUGAJI WA KISASA-DC MURAGILI”.

Imewekwa: July 29th, 2025

Mkuu wa Wilaya ya Bukombe Mhe. paskasi Muragili amekutana wa wafugaji kutoka katika Kata za Uyovu, Runzewe mashariki, Runzewe magharibi na Busonzo tarehe 29 Julai, 2025 katika uwanja wa Ofisi za Kata ya Uyovu kwa lengo la kujadili na kutafuta suluhu ya migogoro ya ardhi na malisho inayowakabili.

Muragili amewataka wafugaji kuachana na ufugaji wa zamani na kuwekeza kwenye ufugaji wa kisasa kwa kuanzisha kilimo cha nyasi za malisho ya mifugo zenye virutubisho vya kutosha  ili kuondokana na changamoto za malisho na magonjwa na pia kuchimba visima kwaajili ya kunyweshea mifugo.

“Tuwe tayari kuwekeza kwaajili ya mifugo yetu, sisi kama Serikali tutawaletea mbegu bure za nyasi ili muweze kuwa na uhakika wa malisho ya mifugo yetu na tutawapa usaidizi kwa kitaalam kuanzia hatua za awali hadi mwisho”.

Aidha Muragili amewataka wafugaji kuwa na uongozi madhubuti utakao waunganisha wafugaji wote na kuratibu changamoto zinazowakabili ili waweze kushirikiana kuzitatua na kujenga mazingira wezeshi kwa wafugaji.

Mbali na hayo Muragili ametoa fursa ya ujenzi wa josho kwa wafugaji hao kwaajili ya kutoa huduma ya uoshaji wa mifugo yao jambo ambalo litakuwa na tija kwao kwa kuepukana na magonjwa ya mifugo.

Ziara hiyo ya Mkuu wa wilaya ni muendelezo wa ziara zake katika maeneo mbalimbali kwaajili ya kusikiliza kero za wananchi na kuzipatia ufumbuzi wake.