Usafi wa Mazingira ni Afya na ni Jukumu letu Sote

Imewekwa: February 25th, 2023

Mkurugenzi Mtendaji wa halmashauri ya Wilaya ya Bukombe Lutengano Mwalwiba amewataka wananchi wa Wilaya ya Bukombe kujenga tabia ya kufanya usafi wa mazingira katika maeneo yao yanayowazunguka kwani usafi ni Afya na ni jukumu letu sote katika kuzuia maradhi.

Mwalwiba ameyasema hayo leo tarehe 25 Februari, 2023 wakati wa zoezi  la usafi wa mazingira la kila Jumamosi ya mwisho wa mwezi lililofanyika katika kijiji cha Kiziba katika Zahanati mpya iliyojegwa kupitia Mradi wa Miundombinu ya kuondoa umasikini TASAF kwa kushirikia na wakuu wa Divisheni, Vitengo pamoja na wananchi wa kijiji cha Kiziba.

Aidha Mwalwiba amewashukuru wananchi kwa kuitikia wito huo wa kufanya usafi.

"Ninawashukuru sana kwa kuja, suala la ushirikiano katika shughuli za usafi ni jambo zuri na linatia moyo. Tumefanya kazi kwa pamoja na kazi imekamilika kwa muda mfupi."

Vile vile amemuagiza Mganga Mkuu wa Wilaya kuhakikisha anafuatilia suala la usajili wa Zahanati hiyo ili iweze kutoa huduma kwa wananchi.

Zahanati hii imekamilika tunataka ianze kutoa huduma kwa wananchi kwani wananchi wamekuwa wakitembea umbali mrefu kwenda kufuata huduma za afya katika kituo cha Afya Ushirombo sasa tunataka huduma hizi wazipate hapa hapa."

Kwa upande wake Richard Edward Mkazi wa kijiji cha Kiziba kwa niaba ya wananchi wa kiziba ameushukuru Uongozi wa halmashauri ya Wilaya kwa kushirikiananao katika zoezi la usafi na wameahidi kutunza miundombinu ya kituo hicho ili iweze kudumu kwa muda mrefu.

Ujenzi wa Zahanati ya kiziba umegharibu kiasi cha shilingi milioni  103.5 ambapo TASAF ilichangia kiasi cha shilingi Milioni 92.4 na wananchi walichangia kiasi cha shilingi milioni 13.010 kupitia awamu ya nne ya TPRP IV  chini ya Jumuiya ya nchi zinazozalisha Mafuta Duniani OPEC.