Vifaa vya kuchakata Dhahabu vya Chama Cha Ushirika Ikuzi vyazinduliwa.

Imewekwa: July 1st, 2021

Mkuu wa Wilaya ya Bukombe Mhe.Saidi Nkumba tarehe 1 Julai, 2021 amezindua vifaa vya kuchakata dhahabu vya chama cha Ushirika cha wachimbaji madini katika mgodi wa Ikuzi huku akiwataka wanaushirika kuhakikisha mradi huo unajizalisha ili uendelee kutoa huduma kwa wananchi ambao wapo katika maeneo ambayo yanamilikiwa na kijiji cha Ikuzi lakini vile vile halmashauri ya Wilaya iweze kunufaika.

Vifaa hivyo ni pamoja na Makaro mawili makubwa, karo moja dogo, pembulio na makarasha matatu vilivyo gharimu kiasi cha shilingi milioni 32, 445,000/=.

"Nimefarijika sana kuona kazi kubwa ambayo mmeifanya kupitia uongozi wenu wa kuanzisha mradi ambao utakiwezesha chama kujiongezea kipato."

Nkumba aliyasema hayo wakati akiongea na wanaushirika katika hafla ya uzinduzi wa mradi huo.

Akisoma risala mbele ya mgeni rasmi Mwenyekiti wa kijiji cha Ikuzi Leo Anthony amemuomba Mkuu wa Wilaya ya Bukombe kuwasaidie kupata leseni.

"Mkuu wa Wilaya Chama chetu hakina leseni ya uchimbaji PML na kina muda mrefu kimekuwa kikiomba leseni bila mafanikio yoyote hivyo basi tunaomba utusaidie katika suala hili."

Chama cha Ushirika cha Wachimbaji Madini Ikuzi kilirejeshewa fedha zake kiasi cha shilingi 60,230,000 na TAKUKURU baada ya kufanya uchunguzi dhidi ya Bodi iliyokuwa madarakani na kuazimia kuanzisha mradi wa uchenjuaji madini ili chama kiweze kujiongezea kipato na kuchangia maendeleo kwa jamii inayowazunguka.