VIJIJI VYA WILAYA YA BUKOMBE VYAPATA UMEME KWA ASILIMIA 100.

Imewekwa: March 2nd, 2024

Jumla ya vijiji 64  vya Wilaya ya Bukombe vimepata umeme na kupelekea kufikia asilimia 100 ya vijiji vyote 64. Umuhimu wa huduma hii utapelekea maendeleo katika huduma za elimu, afya na sekta nyingine za kiuchumi.

Hayo ameyasema Mkuu wa Wilaya ya Bukombe Mhe.Said Nkumba wakati wa hafla ya uzinduzi wa kuwasha umeme katika kijiji cha Bwenda kilichopo kata ya Namonge.

Aidha Nkumba amewataka wananchi kuhakikisha wanalinda na kutunda miundombinu hiyo.

" Sitakuwa na huruma kwa mtu yoyote atakayeharibu miundombinu hii. Tuitunze na kuilinda ili iweze kudumu kwa muda mrefu na kwa kizazi cha baadaye."

Vile vile amewapongeza watumishi wa TANESCO Wilaya ya Bukombe  kwa usimamizi mzuri wa mradi.

"Hongereni kwa usimamizi mzuri wa mradi kwani mmeweza kumaliza changamoto ya upatikanaji wa umeme vijijini na sasa tujielekeze kwenye vitongoji."

Kwa upande wake Meneja wa TANESCO Wilaya ya Bukombe Mhandisi Valerian Myula amesema mradi wa kupeleka umeme vijijini kupitia REA awamu ya tatu mzunguko wa pili katika Wilaya ya Bukombe unatekelezwa na Mkandarasi anayejulikana kwa jina la CRJE- CTCE CONSORTIUM na Mkandarasi mshauri ni MERCADOS - ARIES INTERNATIONAL na mnufaika wa mradi huo ni TANESCO. Jumla ya vijiji vitano ambavyo ni Ifunde, Ihako, Buguba, Ibambilo na Bwenda vimenufaika na mradi huo.

Aidha Mhandisi Valerian Myula aliendelea kusema mradi umegharimu kiasi cha shilingi 1,173,322,136.31 ambazo zimetolewa na Serikali ya Jamhuri ya Muungano wa Tanzania kupitia wakala wa Umeme Vijijini (REA) na jumla ya shilingi 261, 704, 499.30 zimetumika kuleta umeme katika kijiji cha Bwenda.

Akiongea kwa niaba ya Wananchi Diwani wa Kata ya Namonge Mhe.Mlalu Bundala ameishukuru Serikali kwa kuhakikisha wananchi wa Bwenda wanapata umeme wa uhakika ambao utasaidia kujiinua kiuchumi kwa kufanya biashara ndogo ndogo.