Vyakula Viwekewe Virutubisho Muhimu

Imewekwa: October 27th, 2022

Mkurugenzi Mtendaji wa Halmashauri ya Wilaya ya Bukombe Ndg. Lutengano Mwalwiba amezitaka shule zote zinazopokea ruzuku ya chakula kutoka serikalini kuhakikisha  vyakula hivyo  vinawekewa virutubisho muhimu vyenye mchanganyiko wa  madini ya chuma, zinki, vitamin B12 pamoja na asidi ya foliki.

" Tuhakikishe vyakula vya watoto wetu mashuleni vinakuwa na virutubisho  muhimu ili watoto wetu waweze kupata lishe bora pamoja na kuongeza ufaulu."

Vile vile ameziagiza shule binafsi zinazotoa huduma ya chakula kuhakikisha  zinatekeleza agizo  hilo.

Agizo hilo amelitoa  tarehe 26 Oktoba, 2022 wakati wa kikao cha kamati ya lishe cha Wilaya kwa kipindi cha robo mwaka ya kwanza (Julai hadi Septemba, 2022)

Akiwasilisha taarifa ya zoezi la utoaji wa Vitamini A na dawa za minyoo kwenye mwezi wa afya na lishe ya mtoto Afisa lishe Wilaya  Ndg. Said Athumani Ally amesema, Halmashauri ya Wilaya ya Bukombe  kupitia Idara ya Afya imetekeleza zoezi la mwezi wa afya na lishe ya mtoto kwa kuwapatia dawa za minyoo na  vitamin A  watoto wenye umri chini ya miaka mitano.

.Kwa upande wake  Mratibu wa Mashauri ya Watoto katika Mradi wa ACHIEVE kutoka Shirika la NELICO kwa kushirikiana na Pact  Tanzania amesema wataendelea kushirikiana na Halmashauri ya Wilaya ya Bukombe katika kuboresha huduma za lishe ili kuwasaidia watoto walioathirika na Virusi Vya  Ukimwi kuwaboreshea huduma za elimu, Lishe na Uchumi.

Naye Mganga Mkuu Wilaya Dr. Deograsia Mkapa amesema  mpaka sasa Watendaji wa Kata 17 wameishasaini mikataba ya lishe na Mkurugenzi Mtendaji wa Halmashauri ya Wilaya ya Bukombe ili kuhakikisha watoto wote chini ya umri wa miaka mitano wanapata lishe bora yenye virutubisho muhimu katika siku 1000 za awali za makuzi ya mtoto.

Halmashauri ya Wilaya ya Bukombe  imefanikiwa kuwafikia watoto 65,408 wenye umri kuanzia miezi 6 hadi 59 ambao wamepata matone ya myongeza ya vitamini A sawa na asilimia 108 ya malengo ya watoto 60,588 waliotakiwa kufikiwa.

MWISHO