WALENGWA WA TASAF WAHIMIZWA KUCHANGIA NGUVU KAZI KWENYE MIRADI YA MAENDELEO

Imewekwa: November 4th, 2024

Walengwa wa Mpango wa Kunusuru Kaya Masikini (TASAF) wamehimizwa kuchangia nguvu kazi ili kuwezesha kukamilika kwa Miradi mbalimbali inayotekelezwa na TASAF.

Wito huo umetolewa na Afisa Maendeleo ya jamii Zephania Magaso ambaye ni muwezeshaji katika Kituo cha Ushirombo Shule ya Msingi Kata ya Bulangwa wakati wa zoezi la Uhawilishaji wa fedha kwa walengwa.

“Walengwa wenye umri wa miaka 18-60 mnatakiwa kuchangia nguvu kazi kwenye miradi jamii insyotekelezwa na TASAF na wote watakaoshiriki watalipwa ujira badala ya ruzuku ya msingi”.

Aidha amesema kuwa kupitia mpango huu mpya wa uibuaji miradi, walengwa watapata ajira za muda zitakazo wanufaisha kwa kukua kiuchumi na kupata miradi itakayo nufaisha jamii kwa ujumla.

Naye mnufaika Rosemary Boneko kutoka Kitongoji cha Kilimahewa ameishukuru TASAF kwa kuibua miradi ya maendeleo na ameahidi kushiriki nguvu kazi katika utekelezaji wa miradi hiyo.

Kwa upande wake Mratibu wa TASAF Wilaya ya Bukombe Joseph Machibya amesema kuwa katika dirisha la 19 kwa mwezi wa saba na wa nane, jumla ya kiasi cha shilingi 188,548,000 zimetolewa kwa wanufaika 7530 ambao kati yao wanufaika wa benki ni 5904 ambao wamegharimu shilingi 151,452,000 na wanufaika wa mkononi ni 1,626 ambao wamegharimu shilingi 37,097,000