WALENGWA WA TASAF WATAKIWA KUJIANDAA NA UKOMO WA RUZUKU.

Imewekwa: April 28th, 2025

Walengwa wa Mpango wa kunusuru kaya masikini (TASAF) wametakiwa kujiandaa na ukomo wa ruzuku zilizokuwa zinatolewa na Mpango huo.

Hayo yameainishwa leo tarehe 28 Aprili, 2025 na Afisa Maendeleo ya Jamii Vumilia Mchwampaka ambaye ni muwezeshaji katika kituo cha Shule ya Msingi Ushirombo Kata ya Bulangwa wakati wa zoezi la Uhawilishaji fedha ambapo amesema kuwa ifikapo mwezi Septemba, 2025 itakuwa ndiyo ukomo wa ruzuku kwa walengwa.

“Ingawa mpango huu unafikia ukomo, safari yenu ya kuelekea kwenye kujitegemea kiuchumi ndiyo inaanza, tuna amini kuwa mnao ujuzi na nguvu ya kuendelea kustawi “.

Aidha amesema kuwa kupitia vikundi vya kuweka akiba na kukopa vitatoa fursa ya kuendelea kuimarika kiuchumi.

Naye Salome Mhozya ambaye ni mnufaika kutoka Kata ya Bulangwa ameshukuru Mpango huo kwani ume muwezesha kuanzisha mradi wa ufugaji wa kuku ambao umemsaidia kujikwamua kiuchumi na kuhudumia familia yake.

Kwa upande wake Mratibu wa TASAF Wilaya ya Bukombe Joseph Machibya amesema kuwa katika dirisha la mwezi Januari-Februari , jumla ya kiasi cha shilingi 313,311,000/= kimetolewa kwa walengwa 7,618 ambapo kati yao wanufaika wa benki ni 6,274 ambao wamegharimu shilingi 263,805,000/= na wanufaika wa mkononi ni 1,344 ambao wamegharimu shilingi 49,506,000/=