Walezi wa Kata watakiwa kusimamia ujenzi wa madarasa.

Imewekwa: December 2nd, 2021

Walezi wa Kata watakiwa kusimamia Ujenzi wa Madarasa.

Mkuu wa Mkoa wa Geita, Mhe. Rosemary Senyamule leo Disemba 01, 2021 amefanya ziara wilayani Bukombe ambapo amewataka walezi wa kata kusimamia kwa kina ujenzi wa vyumba vya madarasa ili kukamilisha ifikapo mwezi disemba 15, 2021.

"Suala ya saruji iendelee kuagiza kutoka kwenye vyanzo mbalimbali sio kutegemea kutoka sehemu moja ili ndani ya siku hizi zilizobaki tufanye mapinduzi makubwa kwenye ukamilishaji wa madarasa." Amesema Mkuu wa Mkoa.

Akisoma taarifa ya hali ya ujenzi wa vyumba vya madarasa, Mkurugenzi Mtendaji wa Halmashauri ya Bukombe Ndugu Lutengano George Mwalwiba amesema uhaba wa saruji ndio tatizo linalorudisha nyuma ujenzi wa vyumba vya madarasa na kwamba wanafanya juhudi kubwa kuhakikisha wanapata ya kutosha na kukamilisha ujenzi huo.

"Mhe. Mkuu wa Mkoa mpaka siku ya jana tuna asilimia 27 ya utekelezaji wa Ujenzi wa vyumba vya Madarasa na kwamba Nyang'hwale na Bukombe wanafanya vizuri zaidi ukilinganisha Halmashauri zingine, pia Halmashauri ya Geita ndio ambao wako nyuma zaidi kutokana na changamoto mbalimbali walizonazo." Deodatus Kayango, Katibu Tawala Msaidizi Mipango na Ufuatiliaji.

Afisa TAKUKURU Mkoa amesema, wao kama taasisi wametoa wataalamu wa ujenzi kusaidia kushauri kitaalamu juu ya ujenzi wa Miundombinu ya madarasa ili kuongeza spidi ya ujenzi na kuhakikisha wanakamilisha kwa wakati na kwa ubora.

Katibu Tawala Mkoa, Ndugu Musa Chogero amewataka Halmashauri ya Geita yenye ujenzi wa zaidi ya vyumba vya madarasa 300 kwa zaidi ya Tshs. Bilioni 6 kuongeza spidi ya ujenzi na usimamizi ili kuhakikisha wanakamilisha ujenzi kwa wakati.