Wamiliki wa Vibanda soko la Mabatini waridhia kulipa ushuru wa Halmashauri.

Imewekwa: October 20th, 2021

Wamiliki wa vibanda soko la Mabatini katika kijiji cha Lyobahika kata ya Uyovu Wilayani Bukombe wameridhia kulipa ushuru uliopangwa kwa mujibu wa sheria, taratibu na kanuni za halmashauri ili mapato hayo yaweze kuwaletea maendeleo katika maeneo hayo.

Akiongea katika kikao hicho Mwenyekiti wa Soko la Mabatini Gembe Meta amesema.

" Mkurugenzi Mtendaji pamoja na viongozi ulioambatananao sitawaangusha nitakuwa bega kwa bega kuhakikisha mapato ya halmashari yanapatikana na kukusanywa katika soko letu la Mabatini."

Naye Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewataka viongozi wa soko kuwa na mahusiano mazuri na wafanyabiashara ili kujenga umoja na mshikamano.

Aidha amewataka wafanyabiashara hao kulipa ushuru wa halmashauri katika muda uliopangwa.

"Lipeni ushuru wa halmashauri katika muda uliopangwa ili tuweze kuleta huduma bora na kwa wakati kwa wananchi wetu ikiwemo miradi ya maendeleo pamoja na kutoa mikopo kwa makundi maalumu wakiwemo Vijana, Wanawake na watu wenye Ulemavu."

Lutengano ameyasema hayo tarehe 19 oktoba,2021 wakati wa kikao cha wamiliki wa vibanda wa soko la Mabatini pamoja na Kamati ya mapato ya Wilaya.

Akiongea katika kikao hicho Afisa kilimo na umwagiliaji Wilaya Joseph Machibya amesema dhamila ya halmashauri ni kuwahudumia wananchi wake hivyo basi lipeni tozo za halmashauri kwa maendeleo ya wanauyovu na wanabukombe.

Naye Afisa Mipango wa Wilaya Sylivia Rwehabura amesema kwa mwaka wa fedha 2021/22 halmashauri ilipanga kukarabati choo cha soko la Mabatini na utekelezaji umefanyika kwa asilimia 98 na hayo ndiyo matunda ya kulipa tozo.

Mhe. Inyasi Kulusanga Diwani wa Kata ya Uyovu amemuomba Mkurugenzi Mtendaji wa Halmashauri kuhakikisha anawajengea wafanyabiashara wa soko hilo miundombinu ya mitaro ya maji, kuweka umeme ili kuimarisha ulinzi pamoja na kupeleka huduma ya maji safi.

Tozo zilizopangwa na halmashauri kwa mujibu wa sheria kwa wafanyabiashara katika Masoko ni vibanda vya mzunguko shilingi 10,000 kwa mwezi, Vizimba shilingi 6,000 kwa mwezi na tozo ya usafi shilingi 200 kwa siku.