Wananchi kujitokeza kupata chanjo ya UVIKO-19,Wilayani Bukombe.

Imewekwa: August 5th, 2021

"Wananchi wote hususani makundi ya vipaumbele kwa sasa mjitokeze kupata chanjo ili kuendeleza mapambano dhidi ya UVIKO - 19"

 Ushauri huo umetolewa leo tarehe 5 Agosti, 2021 na Mkuu wa Wilaya ya Bukombe Mhe. Said Nkumba wakati wa uzinduzi wa chanjo ya ÙVIKO - 19 uliofanyika katika hospitali ya Wilaya ya Bukombe.

Makundi ya vipaumbele vya chanjo kwa awamu ya kwanza ni watumishi wa afya, watu wenye magonjwa sugu umri wa miaka 18 - 49 na watu wenye umri kuanzia miaka 50 na kuendelea .

Hata hivyo amewaasa wananchi kuendelea kuchukua tahadhari mbalimbali za mapambano dhidi ya UVIKO 19 yaani kukaa mita 1 kati ya mtu na mtu, kuvaa barakoa wanapokuwa kwenye mikusanyiko ama eneo lenye hatari ya maambukizi ya UVIKO - 19 pamoja na kunawa mikono kwa maji tiririka wakati wote unapoingia na kutoka sehemu ulipokuwa ukipata huduma au ukitoa huduma.

Mganga Mkuu wa Wilaya Dr.Odern Ngassa amesema halmashauri ya Wilaya ya Bukombe imekwishapokea jumla ya dozi za watu 7200 za chanjo aina ya "Johnson and Johnson" kwa kuanzia, ambazo zitasaidia kupambana na UVIKO - 19 kwa asilimia 70, kupunguza makali ya Corona pindi unapopatwa kwa asilimia 100 na kupunguza asilimia 94 ya watu kulazwa hospitalini.

Katika halmashauri ya Wilaya ya Bukombe vituo vilivyoteuliwa kutoa huduma za chanjo ni hospital ya Wilaya ya Bukombe, Hospitali ya Uyovu na Zahanati ya Iyogelo.