Wananchi Mtuunge Mkono Mapambano dhidi ya Vitendo vya Ukatili

Imewekwa: December 10th, 2022

Mkuu wa Kitengo cha Maliasili na Utunzaji wa Mazingira Wilaya Gervas Magashi kwa niaba ya Mkurugenzi Mtendaji amewataka wananchi wa Wilaya ya Bukombe kuhakikisha wanaunga mkono mapambano dhidi ya  vitendo vya ukatili wa kijinsia.

"Tutapopambana na vitendo vya ukatili  tutakuwa tumedumisha Taifa lililojaa amani na msingi wa haki za binadamu."

Magashi ameyasema hayo tarehe 10 Desemba, 2022 wakati wa kilele cha maadhimisho ya siku 16 za kupinga ukatili dhidi ya wanawake na watoto yaliyofanyika  shule ya msingi Namonge yenye kauli mbiu isemayo " Kila Uhai una Thamani; Tokomeza Mauaji na Ukatili Dhidi ya Wanawake na Watoto."

Aidha aliendelea kusema kuwa  jukumu la kuhakikisha wahanga wa vitendo vya ukatili wanapata haki zao za msingi ni la jamii nzima , hivyo kila mmoja wetu anatakiwa kutekeleza jukumu hilo kwa lengo la kuhakikisha tunatokomeza kabisa vitendo vya ukatili.

Kwa upande wake Afisa Maendeleo ya Jamii Wilaya  Rita Kamenya amesema lengo la kampeni ya siku 16 za kupinga ukatili ni kutoa elimu kwa umma juu ya madhara ya ukatili na kuhakikisha kila mtu anakuwa barozi na mlinzi wa wanawake na watoto na kuwa na mshikamano wa pamoja wa kupinga vitendo vya ukatili.

Naye A/ INSP. Said Yussuf Ali Polisi Kata Namonge amewataka  wazazi/ walezi kuhakikisha wanatoa ushirikiano kwa Jeshi la Polisi.

"Tupeni ushirikiano kwa kufichua vitendo vya ukatili wala msione aibu ili sheria  ziweze kuchukuliwa dhidi ya wahalifu wa vitendo vya ukatili."

Halmashauri ya Wilaya ya Bukombe katika kutekeleza kampeni  hii imeshirikiana na viongozi wa Taasisi za Dini, Asasi za Kiraia,  Mashujaa wa Maendeleo na Ustawi wa Jamii Tanzania ( SMAUJATA), Watendaji wa kata na vijiji pamoja na Kitengo cha  Dawati la jinsia kutoka Jeshi la Polisi