Wananchi wa Kata ya Igulwa Washiriki Zoezi la Upandaji Miti

Imewekwa: December 7th, 2022

Wananchi wa kata ya Igulwa pamoja na watumishi kwa kushirikiana na viongozi wa Taasisi za serikali na binafsi  katika Halmashauri ya Wilaya ya Bukombe leo tarehe 7 Desemba,  2022 wameshiriki zoezi la upandaji miti katika shule ya sekondari Doto Biteko ikiwa ni kati ya shughuli zilizopangwa kwa ajili ya kuelekea kwenye  kilele cha maadhimisho ya sherehe za miaka 61 ya Uhuru wa Tanzania Bara.

Akiongea katika zoezi hilo la upandaji miti Mwenyekiti wa Halmashari ya Wilaya ya Bukombe Mhe.Yusuph Mohamed Yusuph ambaye ndiye mgeni rasmi wa zoezi hilo, amewata wananchi wa kata ya Igulwa kwa kushirikiana na walimu pamoja na wanafunzi kuhakikisha wanaitunza miti hiyo.

"Tunaomba tuendelee kushirikiana katika kutunza miche hii tuliyopanda na usiwepo hata mche mmoja utakaokufa. Kwa kufanya hivyo tutasaidia kutunza mazingira yetu kwa manufaa ya kizazi cha sasa na kizazi kijacho."

Naye Musa Tendi kwa niaba ya Mhifadhi Misitu Wilaya ya Bukombe amesema ili kuifanya Bukombe ya kijani TFS  imetoa miche 100,000 lengo likiwa ni  kuendelea  kutunza mazingira pamoja na hali ya tabia ya nchi ambapo miti hii itasaidia  upatikanaji wa mvua na kupunguza ongezeko la joto.

Kwa upande wake Afisa Tawala, Ally Mketo kwa niaba ya Mkuu wa Wilaya ya Bukombe  amewashuku wananchi wote kwa kushiriki zoezi hilo muhimu huku akiwataka kuendelea kushiriki zoezi la usafi wa mazingira kwenye maeneo yaliyopangwa  tarehe 8 Desemba, 2022  ikiwa ni muendelezo wa shughuli zilizopangwa kuelekea kwenye kilele cha madhimisho ya sherehe za miaka 61 ya Uhuru.

Kilele cha Maadhimisho ya Sherehe za Uhuru Tanzania Bara yenye kauli mbiu isemayo Miaka 61 ya Uhuru: " AMANI NA UMOJA NI NGUZO YA MAENDELEO YETU." katika Halmashauri ya Wilaya ya Bukombe yanatarajiwa kufanyika  tarehe 9 Desemba, 2022 yakiambatana na mazoezi ya viungo, bonanza la michezo katika viwanja vya shule ya sekondari Ushirombo na mdahalo katika ukumbi wa mikutano wa Halmashauri.