Wananchi wa kipato cha chini kunufaika na CHF iliyoboreshwa

Imewekwa: May 3rd, 2018

Wataalamu wa Idara ya Afya na Idara nyingine za Halmashauri Sita za Mkoa wa Geita, Nyangh’wale, Chato, Geita Mji, Geita Vijijini, Mbogwe na Bukombe ambapo mafunzo ya CHF iliyoboreshwa , Jazia dawa na matumizi ya fedha za kununua Vifaa tiba na dawa yamefanyika katika Ukumbi wa halmashauri ya wilaya ya Bukombe.

Katibu Tawala wa Mkoa wa Geita Selestine Gesimba, amesema mafunzo haya yatawaimarisha ili wafanye kazi kwa ufanisi na wepesi zaidi, awali kulikuwa na changamoto kwa wananchama wa CHF  walikuwa  hawatibiwi nje ya Wilaya kabla ya kuboreshwa  lakini  kwa sasa kuna mabadiliko makubwa yaliyofanywa na serikali, mwanachama anatibiwa Wilaya yoyote hapa nchini, na kuwaomba wanaoshiriki mafunzo hayo kuhakikisha wanawaelimisha wananchi ili wanufaike na huduma za afya zilizo boreshwa.

Kwa upande wake Mshauri wa Menejimenti ya dawa katika mradi huo, Fiona Chilunda amesema Serikali Mkoani Geita kupitia mradi wa Tuimarishe Afya “Health Promotion and System Strenghtening Project(HPSS), ulioanza kwa kutekelezwa kwenye mikoa mitatu na sasa  nchi nzima  kwa kushirikiana na serikali ya Tanzania na Uswiss imesaidia kuendelea kupunguza changamoto  za upatikanaji wa dawa pamoja na vifaa tiba kuanzia  kwenye vituo vya afya, zahanati na hospitali zote nchini.

Chilunda amesema  mafunzo haya yanajikita katika malengo makuu matatu ambayo ni CHF iliyoboreshwa , JAZIA DAWA pamoja na Matumizi ya fedha kwenye vituo vya afya.

Nae Mganga Mkuu wa Mkoa wa Geita Dk Japhet Simeo amekiri kuwepo kwa baadhi ya changamoto ya ucheleweshwaji wa upatikanaji wa dawa na vifaa tiba kwa wakati na kwamba kupitia mfumo huu mpya kutarahisisha upatikanaji wa dawa kwa muda sahihi.

Mganga Mkuu wa wilaya ya Bukombe Dk Irene Mukerebe ameipongeza serikali ya Tanzania kwa kuwa na ushirikiano na serikali ya Uswiss hali ambayo italeta mabadiliko makubwa kutokana na mafunzo.

Pia Mganga Mkuu wa Wilaya ya Chato Dk Athanas Ngambakubi amesema kupitia mafunzo hayo kutasaidia kupunguza baadhi ya changamoto kwenye idara ya afya katika Mkoa wa Geita.

Watalamu mbalimbali wakisikiliza Hotuba ya Katibu Tawala wa Mkoa wa Geita Selentine Gesimba akieleza dhumuni la Mafunzo hayo kwa Wataalamu hawa.

Katibu Tawala wa Mkoa wa Geita Selestine Gesimba akifungua Mafunzo hayo katika Ukumbi wa Halmashauri ya Wilaya ya Bukombe.

Mganga Mkuu wa Mkoa wa Geita Dr.Japhet Simeo akiongea katika ufunguzi wa Mafunzo hayo na kukiri Changamoto ya ucheleweshwaji wa Dawa na vifaa tiba.

Mganga Mkuu wa Wilaya ya Bukombe Dr. Irene Mukerebe (aliyesimama) ameshukuru ujio wa Mafunzo hayo katika Wilaya ya Bukombe.