Wananchi wapongezwa kwa kushiriki shughuli za maendeleo

Imewekwa: January 16th, 2019

Mhe. Rozalia Masokole  Diwani wa kata ya Bukombe kwa niaba ya Mwenyekiti wa kamati ya Elimu, Afya na Maji amewapongeza Wananchi wa Wilaya ya Bukombe kwa ushirikiano wao mzuri na viongozi katika kushiriki na kusimamia miradi ya maendeleo .”Hongereni sana wananchi kwa ushirikiano wenu mzuri mnaounyesha kwa viongozi wenu katika kuibua na kushiriki ujenzi wa miundombinu ya madarasa, afya na maji”

Pongezi hizo amezitoa wakati kamati ya Elimu Afya na Maji ilipofanya ziara ya  kutembelea na kukagua miradi ya Maendeleo tarehe 15 – 16/01/2019 lengo likiwa ni kuhakikisha miradi hiyo inajengwa kwa kiwango kilichokusudiwa na kukamilika kwa wakati.

Aidha Mhe. Rozalia amewaomba wananchi kuhakikisha wanaendelea kujitolea katika kuchangia shughuli za maendeleo hasa katika ujenzi wa vyumba vya madarasa ili kupunguza msongamano wa wanafunzi wa kidato cha kwanza walionza masomo tarehe 07 Januari,2019.

Naye Mhe. Erick Kagoma Diwani wa Kata ya Bulega alisema kituo cha Afya Bulega kilipokea jumla ya Milioni 124 kutoka mfuko wa pamoja wa afya (Health Basket Fund) fedha hiyo ikiwa ni kwa ajili ya ujenzi wa Maabara, ununuzi wa vifaa tiba pamoja na utengenezaji wa mfumo wa maji. Pia amewaahidi wanakamati kuwa kufikia mwishoni mwa mwezi  Februari 2019 ujenzi wa jengo la Maabara kituo cha Afya Bulega utakuwa umekamilika

Aidha Mhe. Yusuph Mohamed  Diwani wa Kata ya Bulangwa amemuagiza Mkuu wa shule  ya sekondari Busonzo Ndg. Simeo Naluyaga kuhakikisha anatambua na kuweka mipaka eneo lote la shule kwa kushirikiana na wananchi ili kuepusha uvamizi holela wa ardhi katika eneo hilo.

Pia Amemuagiza Afisa elimu sekondari ndg Philbert Nyangahondi kuhakikisha anaweka kwenye bajeti  ya mwaka 2019/2020 ununuzi wa miundombinu ya uvunaji wa maji ili kukabiliana na changamoto ya maji inayowakabili walimu pamoja na wanafunzi wa shule hiyo.

Miradi iliyotemelewa ni pamoja na upanuzi wa mradi wa maji Bulangwa, ukamilishaji wa Zahanati ya Businda, ujenzi wa vyumba 4 vya madarasa shule tarajali Kidete, ukarabati wa madarasa shule ya sekondari Bukombe, ujenzi wa vyumba 3 vya madarasa na ofisi 1 shule ya msingi Nyikonga, ujenzi wa Maabara kituo cha afya Bulega, ukamilishaji wa OPD kitu cha afya Msonga, ujenzi wa vyumba 6 vya madarasa na ofisi 2 shule ya msingi Kasozi, ujenzi wa vyumba 2 na ofisi 1  shule mpya Kelesia pamoja na kutembelea shule ya sekondari Ushirombo, Busonzo na shule ya msingi Azimio.

Ujenzi wa Maabara  kituo cha afya Bulega  

    Ujenzi wa vyuma vitatu vya madarasa na ofisi moja  shule ya msingi Nyikonga

Mhe. Yusuph Mohamed  Diwani wa Kata ya Bulangwa (katikati) akitoa taarifa ya ujenzi wa Maabara  kituo cha Afya  Bulega.