Wananchi washerekea miaka 60 ya Uhuru kwa kushiriki shughuli za maendeleo.

Imewekwa: December 9th, 2021

Wananchi wa kata ya Iyogelo Wilayani Bukombe leo tarehe 9 Disemba, 2021 wamesherehekea miaka 60 ya Uhuru kwa kushiriki kuchimba msingi na kupanga mawe ya vyumba viwili vya madarasa katika shule ya Sekondari Busonge.

Akizungumza katika hafla hiyo Mkuu wa Wilaya ya Bukombe Mhe.Said Nkumba amesema.

"Uhuru lazima uendane na moyo wa wananchi kujitolea katika shughuli za maendeleo ili tuweze kuijenga Wilaya ya Bukombe na Taifa kwa ujumla."

Aidha Nkumba ametoa wito kwa wananchi kuendelea kushirikiana na serikali yao na kuachana na baadhi ya viongozi wanaopotosha jamii badala yake waenzi matendo mema ya viongozi wa serikali walioliogoza Taifa kuanzia awamu ya kwanza.

Akiongea katika hafla hiyo Mkurugenzi Mtendaji wa Halmashauri ya Wilaya ya Bukombe Lutengano George Mwalwiba amewataka wananchi wa Wilaya ya Bukombe kuhakikisha wanashiriki katika shughuli za maendeleo kwa kuwa maendeleo katika Wilaya ya Bukombe yataletwa na wanabukombe wenyewe kwa kufanya kazi.

"Ndugu zangu tuhakikishe tunafanya kazi kwani maendeleo yetu yataletwa na sisi wenyewe."

Vile vile amewashuku viongozi wa kata ya Iyogelo kwa ushirikiano waliouonesha katika maadhimisho hayo.

"Nawashukuru sana viongozi wote wa kata ya Iyogelo kwa ushirikiano mliouonyesha katika shughuli hii ya leo kwani mmeonesha moyo wa kizalendo."

Naye Diwani wa Kata ya Iyogelo Mhe. Juma Lushiku amesema wamejipanga kuhakikisha madarasa hayo yanakamilika kwa wakati na katika ubora uliokusudiwa.

 Maadhimisho ya miaka 60 ya Uhuru wa Tanganyika na miaka 59 ya Jamhuri ya Muungano wa Tanzania kiwilaya yamefanyika katika kata ya Iyogelo lengo likiwa ni kuamsha hali ya wananchi kujitolea katika kutekeleza miradi ya maendeleo.