Bomba la mafuta kunufaisha wananchi wa Bukombe

Imewekwa: March 20th, 2018

Wananchi wa wilaya ya Bukombe wanatarajia kupata fursa za ajira za muda mrefu na mfupi, pamoja na wakulima wanaozalisha mazao mbalimbali hasa ya chakula kufanya biashara, kutokana na ujenzi wa  kambi ya wajenzi wa bomba la mafuta kutoka Ohima, Uganda kwenda Tanga, Tanzania hivi karibuni.

Ujenzi wa kambi hiyo ya kudumu wilaya ya Bukombe licha ya kuongeza kipato kwa wananchi na Taifa kwa ujumla, pia itapandisha zaidi hadhi ya wilaya ya Bukombe kutokana na uwepo wa wafanyakazi zaidi ya elfu moja kutoka katika nchi za Uganda, Tanzania na nchi nyingine ambazo zitaleta wataalamu wa masuala ya ujenzi wa bomba la mafuta.

Wananchi wa maeneo mbalimbali wilayani Bukombe wameelezea kufurahishwa na mradi huu ambao utasaidia kukuza uchumi wa wilaya, na kuongeza miundombinu mbalimbali hasa ya barabara na kufanya wilaya ya Bukombe kujulikana kitaifa na kimataifa kwakuwa itakuwa kambi hiyo yenye watu kutoka mataifa mbalimbali ambao watakuwa wateja wa biashara na huduma wanazozitoa.

Bi.Mariam Abell kutoka kijiji cha Bukombe amesema uwepo wa mradi huu kwake imekuwa faraja “hawa wataalamu wametushirikisa kila hatua ya utambuzi wa nani mmiliki halali wa maeneo haya  kwa uwazi, pia najiandaa kuwa mama ntilie ili nipike wakati  wa ujenzi wa kambi hii,alisema Bi.Mariam

Wakati huo huo wataalamu mbambali wanaosimamia mradi huu kwa kushirikiana na wataalamu kutoka ofisi ya Mkurugenzi wa Halmashauri  wamebainisha eneo la Hekta 17 lililopo mkabala na mnada mkubwa wa Bukombe, kijiji cha Bukombe kitongoji cha Isambala ambalo litatumika katika ujenzi wa kambi ya wajenzi wa bomba la mafuta. Zoezi la utambuzi kwa wamiliki halali wa maeneo hayo na mali zao umefanyika ili wananchi waweze kulipwa fidia stahiki.

Mradi wa bomba la mafuta ghafi la Afrika Mashariki umeanzishwa baada ya ugunduzi wa mafuta mnamo mwaka 2006, na yatazalishwa katika bonde la ziwa Albert nchini Uganda, ujenzi wa boma hili la mafuta lenye urefu wa kilomita 1,450 chini ya ardhi litasafirisha mafuta ghafi kutoka Uganda kwenda pwani ya bahari ya Hindi ili kulenga masoko ya kimaifa, ujenzi huu utadumu zaidi ya miaka miwili.

 Wananchi wa kijiji cha Isambala kata ya Bukombe wakionyesha nyuso za unufaikaji wa mardi wa bomba la mafuta baada ya utambuzi wa maeneo yao.

  Bi.Mariam Abell akiwa ameshikiria bango la taarifa zake zitakazotunzwa kama kumbukumbu baada ya zoezi la utambuzi wa eneo lake litakalochukuliwa na mradi.

 Mtaalamu wa Ardhi Bwana Francis akimpiga picha Mzee Kasandiko ili kutunza kumbukumbu ya mmiliki halali wa Eneo Hilo wakati wa kulipa fidia stahiki kusiwepo udanganyifu.

 Alama ya kipande cha mti chenye kibendera zilizowekwa katika maeneo ya ujenzi wa mradi wa kambi ya wajenzi.

 Makazi ya wananchi yatakayochukuliwa kupisha ujenzi wa mradi huu.