WANAWAKE BUKOMBE WAHIMIZWA KUJITOKEZA KUPIMA SARATANI YA SHINGO YA KIZAZI NA MATITI

Imewekwa: March 1st, 2024

Mkuu wa Wilaya ya Bukombe Mhe. Said Nkumba amewataka wanawake wote katika Halmashauri ya Wilaya ya Bukombe kujitokeza kwa wingi kufanya uchunguzi wa Saratani ya Shingo ya Kizazi pamoja na Matiti.

Nkumba ameyasema hayo leo tarehe 01 March, 2024 wakati wa  zoezi la upimaji wa Saratani ya Shingo ya Kizazi na Matiti katika Hospitali ya wilaya ya Bukombe ikiwa ni shughuli kuelekea kilele cha Siku ya Mwanamke Duniani yenye kauli mbiu isemayo "Wekeza kwa Wanawake, Kurahisisha Maendeleo ya Taifa na Ustawi wa Jamii."

Aidha Nkumba amewataka wanawake kufanya uchunguzi ili kujua hali zao.

“Jitokezeni kwa wingi ili  mfanye uchunguzi mapema na muweze kujua hali za afya zenu na muweze kupata matibabu kwa haraka zaidi”

Vile vile Nkumba aliongeza kwa kusema kuwa Saratani inauwa sana kwasababu watu wengi hawana utaratibu wa kufanya uchunguzi wa afya zao mara kwa mara.

Kwa upande wake Mkurugenzi Mtendaji wa Halmashauri ya Wilaya ya Bukombe Lutengano Mwalwiba, ameipongeza Idara ya Maendeleo ya Jamii kwa kushirikiana na Idara ya Afya kwa kuratibu zoezi hilo kwani litasaidia wanawake wengi kujua afya zao. 

 “Hongereni sana kwa kuwa chachu ya Maendeleo katika jamii kwa kujali na kuthamini afya za wanawake wote kwani afya ni mtaji”.

Naye  Mganga Mfawidhi wa Hospitali ya Wilaya ya Bukombe Dr. Yohana Fumbuka akiongea kwa niaba ya Mganga mkuu wa Wilaya ya Bukombe, amewataka wanawake kuwa na utaratibu wa kufika hospitali mara kwa mara kwa ajili ya kufanya uchunguzi kwasababu Saratani ikigundulika kwa haraka inakuwa rahisi kutibika na kuokoa uhai wa wanawake wengi.

Zoezi la upimaji wa Saratani ya Shingo ya Kizazi na Matiti linafanyika bure kuanzia tarehe 01-05 March 2024 ikiwa ni muendelezo wa matukio mbalimbali yatakayofanyika katika kuelekea kilele cha Siku ya Wanawake Duniani  ambapo katika Wilaya ya Bukombe itafanyika siku ya tarehe 06 March, 2024 katika viwanja vya Stendi ya Mabasi Ushirombo.