WANAWAKE WAHIMIZWA KUGOMBEA NAFASI MBALIMBALI KATIKA UCHAGUZI-DC NKUMBA

Imewekwa: March 7th, 2024

Mkuu wa Wilaya ya Bukombe Mhe. Said Nkumba amewataka wanawake wa Halmashauri ya Wilaya ya Bukombe kujitokeza kwa wingi kuwania nafasi mbalimbali katika uchaguzi wa Serikali za Mitaa, Vijiji na Vitongoji unaotarajiwa kufanyika mwaka huu.

 “Wanawake changamkieni fursa hii kwa kujitokeza kwa wingi kugombea nafasi mbalimbali ili mzidi kuleta mabadiliko katika jamii."

Nkumba ameyasema hayo katika sherehe za Maadhimisho ya siku ya Wanawake Duniani ambapo Kiwilaya yalifanyika tarehe 06 Machi, 2024 katika viwanja vya Stendi Kuu ya Mabasi Ushirombo.

Vilevile Nkumba amewasihi Wanawake kuwaunga mkono wanawake wenzao watakaojitokeza kuwania nafasi hizo za Uongozi.

Kwa upande wake Kaimu Mkurugenzi wa Halmashauri ya Wilaya ya Bukombe Zedekiah Osano amewapongeza wanawake wote kwa kuadhimisha siku hiyo muhimu.

 “Hongereni Wanawake wote kwa kuadhimisha siku hii muhimu kwenu kwani wanawake ni jeshi kubwa na mnategemewa na jamii na Taifa kwa ujumla katika kuleta Maendeleo na mabadiliko chanya katika jamii yetu”

Naye Mkuu wa Divisheni ya Maendeleo ya Jamii Melania Kwai amesema Halmashauri ya Wilaya ya Bukombe katika kutekeleza kauli mbiu ya Siku ya Wanawake Duniani 2024 imeweza kufanya zoezi la upimaji wa Saratani ya Shingo ya Kizazi na Matiti, kutoa elimu ya mpango wa dhana ya shule salama kwa wanafunzi  wa shule za Msingi na Sekondari,  Kutembelea Wafungwa na Mahabusu katika Gereza la Wilaya ya Geita pamoja na kutoa taulo za kike kwa baadhi ya shule za Msingi na Sekondari.

Maadhimisho ya siku ya Wanawake Duniani hufanyika tarehe 08 Machi ya kila mwaka ambapo kwa mwaka huu yameambatana na Kauli Mbiu isemayo, Wekeza kwa Wanawake; kurahisisha Maendeleo ya Taifa na Ustawi wa Jamii.