Washiriki wa Zoezi la Sensa ya Watu na Makazi Wapatiwa Vyeti vya Pongezi

Imewekwa: September 3rd, 2022

Mkuu wa Wilaya ya Bukombe Mhe. Said Nkumba ametoa vyeti vya Pongezi kwa washiriki 816 walioshiriki zoezi la Sensa ya Watu na Makazi mwaka 2022 katika Halmashauri ya Wilaya ya Bukombe.

"Sisi kama Serikali tumeamua kutoa vyeti hivi ili viwe kumbukumbu kwenu na tunatambua mchango wenu kwa kushiriki kikamilifu na kufanikisha zoezi hili muhimu hongereni sana."

Pongezi hizo amezitoa tarehe 3 Septemba, 2022 wakati wa hafla fupi iliyoandaliwa na Kamati ya Sensa Wilaya iliyolenga kuwapongeza washiriki wa zoezi hilo muhimu la Taifa kwa ajili ya Mpango wa Maendeleo  Endelevu.

Akiongea katika hafla hiyo Mkurugenzi Mtendaji wa Halmashauri ya Wilaya ya Bukombe Lutengano Mwalwiba amewapongeza washiriki wote kwa kufanikisha ujazaji wa madodoso kwa njia ya kieletroniki.

" Sensa ya mwaka 2022 ilikuwa ya kidijitali na madodoso yote mmefanikisha kuyajaza kwenye vishikwambi hongereni sana."

Naye Mratibu wa Sensa Wilaya Sylvia Rwehabura alisema zoezi hili lilihusisha washiriki 816 wakiwemo  Wasimamizi wa Maudhui, TEHAMA, Makalani pamoja na Wakufunzi 33 ambapo 24 walitoka ngazi ya Halmashauri na 9 walitoka Ofisi ya Takwimu ya Taifa (NBS).

Jonathan Joseph Kishimbi Karani kutoka  kata ya Busonzo kwa niaba ya washiriki wenzake ameishukuru Serikali kwa kuwapatia ajira ya muda.

" Tunaishukuru sana Serikali kwa kutupatia ajira ya muda mfupi kwani kiasi cha fedha tulichokipata kimeweza kukidhi sehemu ya mahitaji yetu muhimu. Tunaihaidi serikali kuwa  mazoezi mengine ya kitaifa yatakapotokea tupo tayari kufanya kazi kikamilifu."

Sensa ya Watu na Makazi ni chanzo pekee cha Takwimu za kidemografia ambazo hutumika kupanga na kufuatilia utekelezaji wa Mipango ya Maendeleo Endelevu ya wananchi katika sekta zote za kiuchumi, kijamii na kimazingira  ambazo  zina mchango mkubwa katika kupunguza umaskini.

"SENSA YA WATU NA MAKAZI YA MWAKA 2022, TAYARI TUMEISHAHESABIWA."