WASIMAMIZI WA UCHAGUZI NGAZI YA KATA WAASWA KUZINGATIA MAELEKEZO

Imewekwa: August 4th, 2025

Msimamizi wa Uchaguzi jimbo la Bukombe Zedekia Solomoni Osano amewaasa Wasimamizi wa Uchaguzi ngazi ya kata kuhakikisha wanafuata maelekezo.

"Hakikisheni mnafuata sheria, kanuni, taratibu, miongozo pamoja na maelekezo mbalimbali yatakayotolewa na Tume Huru ya Taifa ya Uchaguzi."

Hayo ameyasema leo tarehe 04 Agost, 2025 wakati wa ufunguzi wa mafunzo ya wasimamizi wa Uchaguzi ngazi ya kata yanayoendelea kufanyika katika ukumbi wa Mikutano wa Halmshauri kuelekea uchaguzi Mkuu wa Rais, Wabunge wa Jamhuri ya Muungano na Madiwani kwa Tanzania Bara utakaofanyika Oktoba, 2025.

Aidha amewataka wasimamie viapo vyao.

"Simamieni viapo vyenu vya kutunza siri  na kujitoa uanachama wa chama cha siasa katika kipindi chote cha uchaguzi."

Vile vile amewasihi kuzingatia mafunzo watakayopewa na kutoa uzoefu wa usimamizi wao wa siku za nyuma ili iwe somo katika utekelezaji wa jukumu lililopo mbele.

Mafunzo haya ya siku tatu yanajumuisha washiriki 34 kutoka kata 17 za Halmashauri ya Wilaya ya Bukombe ambao ni Wasimamizi Wasaidizi wa Uchaguzi ngazi ya Kata.

"Kura yako Haki yako Jitokeze Kupiga Kura"