Watendaji wa Kata Wasaini Mikataba ya Lishe

Imewekwa: October 23rd, 2022

WATENDAJI WA KATA WASAINI MIKATABA YA LISHE.

Watendaji wa kata 17 katika Halmashauri ya Wilaya ya Bukombe  wamesaini mikataba ya lishe baina ya Mkurugenzi Mtendaji  katika kikao cha kamati ya shughuli za lishe kwa kipindi kipindi cha Julai - Septemba, 2022 lengo likiwa ni kuhakikisha watoto chini ya umri wa miaka mitano wanapata lishe bora yenye virutubisho muhimu hasa katika siku 1000 za awali za makuzi ya mtoto.

Akifungua kikao hicho Mkuu wa Wilaya ya Bukombe Mhe.Said Nkumba, amemtaka Mganga Mkuu  Wilaya kuhakikisha anaongeza nguvu katika usimamizi wa masuala ya lishe.

"Sisi Bukombe tumekuwa tunafanya vizuri kwenye shughuli zetu lakini kwenye suala ya lishe tumefanya vibaya kwa muda wa miaka miwili mfululizo. Mganga Mkuu hakikisha  unaongeze nguvu ya kusimamia lishe katika Wilaya yetu.

Naye Mkurugenzi Mtendaji wa Halmashauri ya Wilaya ya Bukombe Lutengano Mwalwiba amesema kuwa ofisi yake  na ofisi ya Mganga Mkuu zimejipanga kufanya mapinduzi makubwa kwenye lishe.

" Tumejipanga kufanya mapinduzi makubwa kwani katika kipindi cha robo ya kwanza halmashauri imeishapeleka shilingi milioni 13 kwenye shughuli za lishe."

Akiwasilisha taarifa ya Tathimini ya Utekelezaji wa shughuli za Mkataba wa lishe Afisa Lishe Wilaya Said  Athuman Ally amesema kuwa kuna viashiria 9 vya mkataba wa Lishe ambavyo kata upimwa kila baada ya miezi 3 ambapo viashiria hivyo vikitekelezeka kwa asilimia miamoja halmashauri itakuwa imepambana na utapiamlo hasa katika maeneo ya kipaumbele yaliyomo katika Mkataba wa lishe ngazi ya Wilaya, kata na Vijiji.

Kwa upande wakeMganga Mkuu wa Wilaya ya Bukombe Deograsia Mkapa, amewataka watendaji wa Kata kuhakikisha wanashiriki kikamilifu siku ya afya na lishe ya kijiji mara moja kwa kila robo mwaka na kubandika taarifa kwenye ofisi za vijiji. Vile vile amesisitiza kuwa katika kila kikao cha kijiji na kata agenda ya lishe iwe ndiyo agenda ya kudumu.