WATOTO WAPATIWA CHANJO YA SURUA NA RUBELLA -BUKOMBE

Imewekwa: February 15th, 2024

Mkuu wa Wilaya ya Bukombe Mhe.said Nkumba leo tarehe 15 Februari, 2024 amezindua chanjo ya Kitaifa ya Surua na Rubella huku akiwataka wazazi/walezi kuhakikisha wanawapeleka watoto wenye umri wa miezi 9 hadi miaka 5  kwenye vituo vya kutolea huduma za afya ili waweze kupata chanjo hiyo.

"Chanjo hiyo inatolewa bila malipo yoyote, tuhakikishe tunawapeleka watoto kupata chanjo ili kuwakinga dhidi ya ugonjwa wa Surua na Rubella."

Aidha Nkumba amewaonya watu wanaopotosha juu ya usahihi wa chanjo na amewataka kuacha tabia hiyo mara moja kwani hatua kali za kisheria zitachukuliwa dhidi yao.

Kwa upande wake Mganga Mkuu wa Wilaya ya Bukombe Dr.Deograsia Mkapa amesema ugonjwa wa Surua na Rubella hauna dawa hivyo ni muhimu kuwapeleka watoto kupata chanjo ili kujiepusha na madhara yatokanayo  ya ugonjwa huo kama vile kuchomi, kuharisha, homa ya uti wa mgongo, maambukizi makali masikioni na kifo.

Aidha Dr.Deograsia amesema dalili za ugonjwa wa Surua na Rubella ni pamoja na homa, mafua, kikohozi, Macho kuwa mekundu na kutoa majimaji, vipele vidogo vidogo vinavyoanzia kwenye paji la uso na nyuma ya sikio na kusambaa mwili mzima na amemuhakikishia Mkuu wa Wilaya kuwa zoezi hilo lifanyanyika kama lilivyokusudiwa.

Halmashuri ya Wilaya ya Bukombe imepokea jumla ya chanjo 74,000 ambazo zitatumika kwenye vituo 50 vya kutolea huduma za afya kwa walengwa 66,591.