Watoto Wapewe Chanjo ya Polio

Imewekwa: September 2nd, 2022

Kaimu Mganga Mkuu wa Wilaya ya Bukombe Dr.Deograsia Mkapa mapema leo tarehe 2 Septemba, 2022 amekutana na timu za wasimamizi wa kampeni ya chanjo ya Polio kwa watoto wenye umri chini ya miaka mitano huku akiwataka kuhakikisha  wanazisimamia vizuri timu za uchanjaji ili watoto wote waweze kupata chanjo ya Polio.

"Hakikisheni mnazisimamia vizuri timu za uchanjaji ili watoto wetu wote waweze kupata chanjo ambayo itawakinga dhidi ya ugonjwa wa Polio."

Aidha ametoa wito kwa wazazi na walezi wa watoto kuhakikisha  wanatoa ushirikiano ili watoto wote waweze kupatiwa chanjo.

"Chanjo hii  ya matone inatolewa  bila malipo yoyote na inatolewa nyumba kwa nyumba na katika vituo vyote vya kutolea huduma za Afya hivyo wazazi na walezi wa watoto tunaomba ushirikiano wenu wa hali na mali ili watoto wetu wote waweze kupata chanjo hii muhimu."

Aidha aliendelea kusema kuwa ugonjwa huu wa Polio hauna tiba ila unazuilika kwa kupata chanjo ya matone ya kukinga Polio.

Halmashauri ya Wilaya ya Bukombe inaendelea kuendesha kampeni ya  chanjo ya Polio kwa siku ya pili na imelenga  kuwafikia  watoto wapatao 91,832  lengo likiwa ni kuikinga Tanzania na mlipuko wa Polio uliozikumba nchi jirani za Malawi na Msumbiji ambazo zinamuingiliano wa karibu kijamii na kiuchumi.

MPE MATONE, OKOA MAISHA