wazee waazimisha siku yao

Imewekwa: October 30th, 2022

Wazee wa Halmashauri ya Wilaya ya Bukombe wameadhimisha siku ya Wazee Duniani tarehe 31 Oktoba, 2022 lengo likiwa ni kuwakumbusha, kuwahimiza na kuwahamasisha wananchi na viongozi wote juu ya utekelezaji wa sera, Mipangi, Mikakati na Mikataba ya Kimataifa inayohusu Ustawi na Maendeleo ya wazee hapa nchini.

Akiongea katika sherehe hizo Katibu Tawala Wilaya  ya Bukombe Ndg. Paul Cheyo kwa niaba ya Mkuu wa Wilaya amewataka wazee hao kuhakikisha wanajiunga na Bima ya Afya iliyoboreshwa (ICHF) ili kupunguza changamoto za matibabu.

" Wazee wangu tuhakikishe tunajiunga na mfuko wa Bima ya Afya ili tuweze kupata matibabu ya uhakika mahali popote kwa kufuata utaratibu wa rufaa kwa ngazi zote za kutolea huduma kwa kiasi cha  shilingi 30,000/= kwa familia ya watu wasiozidi sita."

Naye Mganga Mkuu wa Wilaya Dr.Deograsia Mkapa alisema  Halmashauri ya Wilaya ya Bukombe imeweza kuunda Mabaraza ya Wazee katika ngazi ya vijiji, kata na Wilaya kwa ajili ya wazee kutetea haki zao na kujadili changamoto zinazowakabili.

Aidha Dr.Deograsia aliendelea kusema kuwa  Idara ya Afya inakabiliwa na ufinyu wa rasilimali fedha kwa ajili ya kuendelea kuhamasisha haki za wazee, kutoa vitambulisho vya wazee na kukidhi mahitaji yote ya dawa.

Akiongea kwa niaba ya wazee wa Wilaya ya Bukombe Paul Nonga alisema wazee tulio wengi hatuna uwezo wa kujimudu kimaisha hivyo familia zinatakiwa kuendelea kututunza na matunzo ya wazee katika makazi ya wazee liwe ni Kimbilio la mwisho baada ya njia nyingine za matunzo kushindikana.

Halmashauri ya Wilaya ya Bukombe ina jumla ya wazee 8,499 me wakiwa  4,176 na ke 4,323 ambao wameadhimisha siku ya wazee Duniani yenye kauli mbiu isemayo " Ustahilimivu na Mchango wa Wazee ni muhimu kwa maendeleo ya Taifa." Maadhimisho hayo yamekwenda sambamba na utoaji wa huduma mbalimbali kwa wazee ambazo  ni pamoja na huduma ya upimaji wa VVU, Malaria na Sukari. Huduma ya chanjo ya UVIKO -19 na huduma ya hali ya lishe kwa kupima uwiano wa uzito na urefu pamoja na ushauri wa masuala ya lishe.

MWISHO