Ziara ya kamati ya fedha ,uongozi na mipango.

Imewekwa: July 24th, 2021

 Kamati ya kudumu ya Fedha, Uongozi na Mipango tarehe 22 - 23 Julai, 2021 imefanya ziara ya kutembelea na kukagua miradi mbalimbali ya maendeleo ikiwemo miradi ya Idara ya Afya, Elimu na Mifugo.

"Hakikisheni miradi yote inakamilika kwa wakati ili iweze kutoa huduma iliyokusudiwa."

Maagizo hayo ameyatoa Mwenyekiti wa Halmashauri hiyo Mhe. Yusuph Mohmed Yusuph Diwani wa Kata ya Bulangwa wakati wa ukaguzi wa miradi hiyo.

Naye Makamu Mwenyekiti wa Halmashauri ya Wilaya ya Bukombe Mhe.Leokadia kasase amezipongeza kamati za ujenzi kwa usimamizi mzuri wa miradi ya maendeleo.

"kamati za ujenzi hongereni kwa usimamizi mzuri wa miradi ya maendeleo kwa kufanya hivyo mmeifanya halmashauri ya Wilaya Bukombe kuwa ni Wilaya inayotekeleza miradi yake katika hali ya ubora.

Naye Mwalimu Mkuu wa shule ya Msingi Ushirombo Peter James Matipa amesema kukamilika kwa vyumba viwili vya madarasa kwa shule yake kutasaidia uboreshaji wa mazingira bora ya kujifunzia na kifundishia, kupunguza msongamano wa wanafunzi madarasani pamoja na urahisishaji wa tendo zima la ufuatiliaji wa kitaaluma kwa wanafunzi.

Akisoma taarifa ya utekelezaji wa ukamilishaji wa mradi wa Maabara moja uliogharimu kiasi cha shilingi milioni 30 Mkuu wa shule ya sekondari Businda Yunia Bukurie amesema changamoto zilizojitokeza katika utekelezaji wa mradi ni pamoja na kupanda kwa bei na kuadimika kwa vifaa vya ujenzi kama vile mbao kwa ajili ya kutengeneza samani na aluminiam kwa ajili ya madirisha.

Miradi iliyotembelewa ni ujenzi wa Zahanati ya Silamila, ukarabati wa Machinjio ya Katente, ujenzi wa Zahanati ya Bwenda, ujenzi wa choo matundu 12 shule ya msingi Mwenge, ujenzi wa madarasa 2 na matundu 12 ya choo shule ya msingi Katente, ukamilishaji wa madarasa 2 na matundu 12 ya choo shule ya msingi Ushirombo, ujenzi wa choo matundu 12 shule ya msingi Azimio, Ujenzi wa madarasa 2 na ukamilishaji wa Maabara 1 shule ya sekondari Businda, ujenzi wa matundu 12 ya choo shule ya msingi ushirombo na ujenzi wa jengo la Utawala na Madarasa shule ya Sekondari Doto Biteko.